رفعت الصافي
ساعي البريد…
امحلفك بكل ظرف
لو شفته ارجع كله ولفك تعب…
وكله بفركتك وجهه ماينسكن
شايل ملامح بيت شيخ انهب…
محتاج اشمك شيله . غتره . عكل
الملحان تستاحش اكبال الذهب…
بي شوغت الغركان من ينتجي
اعلى الماي ويحس بيت ولفه انجهب…
فاضت عيوني وغرزت مهرتي
وجيت والاخضر بروحي التهب…
يم ناس مامش بيها ريحة علي
بجيوبهم ماتلكه غير العتب…
صفنت طير الدوح كد ما اون
بفراكك وعشت انتكاسة شعب…
ركضني حبك ع الحبل تك رجل
ركضة حرامي بنص عراضة رتب…
خليني اشمك شم عجوز الكبر
من عدها ابنها بيوم عرسه انسلب…
من قال ان الموت لا يلتقى
تالله القاه كنهر عذب,,,
باقي كأني سدرة المنتهى
فالموت موت من جذوري شرب,,,
الكصدو البيتك والله مافرزنو
رزه اعلى بابك مدري جفي انصلب…
عبالهم نخله ويهزني البعض
ودموعي توكع اسرع امن الرطب…
اتراجف ابملكاك مثل ابدوي
كالوله ولفك لبن ابوك انخطب…
محد لجح مكفاي مكفى البلم
اتحدى روجه تكول وجهه انكلب…
فزاعه ظلت بس رسم عزتي
اويلطين صارت عندي عشرة كصب…
شلتك على متوني ومشيت بوكت
بمتون ابوي مسوي حفله الحطب…
بلملكه تحجي وانته شابع سفر
مثل السئل دفان عن الطرب…
المشلول تخنك ريته الكنطره
يذكر اجدامه اعلى الجرف لو ثغب…
المهم كلشي ولا تهل دمعتك
لو شفت نعشي اعلى لمتون انصب
ولا يبقى بالك يمي عيش أطمئن
مانقصي شي بس ماي وجهي انشرب
