محمد وجيه

بيني وبين صوتك كاع. ماترضه اسمع همومك
خرسه مرايتك حدما. تجيهه تسولف رسومك.
يالتگطر هله وبيبان. من يلتمن غيومك
خوفي من الوكت بس لا. يغير ريحه هدومك
اجيتك خايفه مرايه شايلهه حزن مشلول
اجيتك جايبه شجم حرف مامگيول
وجوتني انفاس اليموتون
وحدر جدمي احس خلت الكاع تفور
وجبتلك عطرك الغالي
ورشيتك وراحت ريحه الكافور
ييمه اكبر وموت انوب
وعدت عيوني تتلگاك من تكبر مناطرتك
ومالحكت اكبرنك لجن بالصور كبرتك
وكلش صدكت روحي ولبس الزلم لبستك
ييمه اكبر
مامقتنعه اگل للناس يكبر جسمه لكن وجهه ما يكبر
ييمه اكبر
شمايكبر حزن روحي الخلگ يزغر
ييمه اكبر
تعبت اتخايلك تكبر
بس لا دربك يطول خفت لا اذكر عيونك واحوجل بالدمع واعثر
وبس لا حزنك يطول اخاف على الدمع ينشف
وانه غيمه بطرك كطره وعطش بستان يمي عيني تدنه وصف
ويرف جفني….
ويوصلنك رگص يم لهفتي البيبان
شعجب ماجيت من كلبي على طولك رف
حمل زايد احس روحي عله متن الكاع
ومن تثكل عيوني عتاب احس جدمي عله كبرك خف
فراكك خلف بصدري منيه وطف
وسكيتك مي ورد بلجن تخضر انوب
وتانيت وسمعت الكاع بيه تصيح
الورد ماينسكي بمي ورد اله يموت
جبت عمري بطرك جلمه وحجاهه الموت
ولظمت سنينك كلاده
وماحسبت تنمد رگبه التابوت
كالو مات كتلهم غفه تعيبان
كالو ماشهگ كتلهم بلاصوت
نسمه بمشيته ولو داس فوك الكاع
ميفززهه كدما حبت جدامه
كالو جثته خفت من بده التشييع
واكلهم يستحي من جان عمره كماط
يستر صدري بيده ويرضع ابهامه
واحطله القاسمه الله ويشبع ويرتاح
من يشوفني اكل زين كدامه
ولان ماصدكيت تموت
گلب الوالده يسوي الگبر بستان
واكلهم مايسمعوني
الظنه مايندفن ينزرع حته اسگيه
وياهو الكال مات ابنج ،،ذبل مامات
وردت فلاح ياهو الصاح ع الدفان
شبيهه الناس مافرزنت حنيتي
اول مره اشوفن ناس تزرع ورد بالسرداب
واول مره اشوفن كاع تتحزم اذا طاري الدفن ينجاب
وموش بماي
تانيتك تخضر من سگوك تراب
ولاموني ويفور الدمع بعيوني
ورادوا مايظل طاريك بظنوني
ونسوني بكثر مارادوا ينسوني
وبيني وبينك تمنيت
ردت اطلع،،،، لجن فرگاك مابي باب
وتريدوني افك حزني الحزن موباب
اهيسك تزرع بروحي حزن ماينشلع جذره
ولوبيدي افيض الكاع بلجن توصلك كطره
يعبد الله الضوه يسلم عله عيونك
يعبد الله السهر مشتاگ لجفونك
وييمه الكمره بس تسولف بلونك
يتارس عين المرايات ياكشخه سواليفي
وكلشي بكيف طارييك بقت بس دمعتي بكيفي
يعبد الله السفر للموت مايحتاج تتهندم
ضم قمصانك الحلوات واكشخ بالجفن والدم
وييمه التهي بذكر الله
ي عبدلله متاع الخايف من الموت ذكر الله
ويايمه شكثر فزيت يم كبرك احس يهتز
ويايمه شكثر هزيت كبرك ردت مره تفز
ويمته تفز؟؟
احس روحي درب مشبوه اذا ما اكلك اسم الله
وياكبرك صبح نيشان للتيهو موتاهم
الشجر يم كبرك بفييه يتلگاهم
ي غيمه ستري انه خلافك احس روحي ضوه مفرع
وكلت بلجن يجي وخليت باب عوينتي مشرع
دبردني تره بنارك احس الروح تتفرگع
اليكلك ضحكت يجذب
انه امك بالنحيب اطرب
ومن عيوني يشرب وحشته المغرب
ي التگاطف سهر ع الليل.يايمه السهر يعتب
وانه شفتك شلون تموت. ماشفتك شلون تحب
واجيت زرعت يم كبرك حديقه بيت
واظل اتنطرك حدما تجيني من الگبر وتكلي اريد العب
واظل اتنطرك حدما تمل من موتك وتتعب