محمد وجيه

ابدي منين وانته منين ما ابديك
تخضر حيرتي وبسدهه يذبل حل

وانخاك من اطب مرحله الاستيعاب
مابيه اجهل ولا بيه زود اسأل

واحير بنص قلقهن حيرة متيهين
اليدليهم تبين هوه مايندل

وقريتك هجره هجره،،وماوصلت وياك
واحفظنك وارد بأول سؤال افشل

غضينه النظر عن كلشي ينفع بيك
وقرن ردينه خاطر نثبت انت اول

ولمتهم وانه ادري بورثك المسلوب
بس صعبه من اشوفك رقم يتسلسل

علي اكبر من رقم بس همه ماشافوه
والا ياهو يرضه بحكمه يتأجل

جهر عبدوك اعدك وين اذا عديت
وطبيعي عله العبد معبود يتفضل

ومايبقاله راي الراد يبحر بيك
واهو بطرك العقل والعقل مايحمل

واتدنه لضواك وخوفأ من الله
اخلي عيوني من بعيد تتأمل

الشمس تدفه عله خلك الله وتنام الريح
اذا حجي الله مره بصوتك ترتل

علي بيا بخت غيرك يجمع القرأن
واهو من صدر طه لصدرك تنزل

بمعايير العلم والفهم والادراك
علي ببين السطور بكيفه يتجول

علميأ اجتاز حدود الاستنتاج
گبل المشكله بمقدرته ينطي الحل

علي سهله الضوه يستخرجه من الماي
وماسواهه خاف عقولهم تختل

بقانون الجذب ماساعده التفاح
وعلى سير النجم بالفلك ماعول

علي بزغره ويرد من ينسئل بهلال
بيالحظه انولد وبياوكت يكمل

ورغم ماتنطوي بمشيه جدامه الكاع
و اذا ماتنطويله الكاع هم يندل

علي بلا بوصله وفرزن مسير الريح
ومن وجه التراب شتاخذ وترحل

علي بفضل اقتصاده ياهو ظل جوعان
الفقير بوكته جان يحسده المدلل

ومن صار بعهدته انتعش بيت المال
ويمول من عكب ماجان يتمول

علي الكال البعوض بوجهه ميه عين
وكبل عقدين الهه المجهر توصل

وعلي الكال الطفل من يبجي لتسكتوه
وثبت فيما بعد لليبجي شوف افضل

وكشفو اجهزه تحلل ضوه بكل عين
وبعدهه توصلو بالدمع تتفعل

خلايا المخ واذا فاقن المليارين
علي كل وحده يعرفهه شوكت تعمل

علي شسالوك ع المنبر ومارديت
ما اصدك المثلك بالعلم يبخل

بس لمن كلت علم الانسان سلاح
بهالحاله اليسالك يعتبر اعزل

علي ضد من يحط فزاعه بالبستان
لان تنسد شهية الطير من يجفل

علي كبل الحرب يحسب اعداءه حساب
ويوصل حقوق الراح تترمل

شكد زارع وكاعك بحر من تنشاف
عله جيتك طفله جنهه بسعف تتكذل

يهمشونك واشم ريحة حرگ بالروح
ومن مهره عيوني الغيظ يترجل

انشف خوف واشرب كبتك اطمئنان
اجي مهدل وارد من صحنك معدل

عله سنبل ذنوبي وترس گاع الروح
وماهمني ان عله من استغفرك منجل

و اتبده عله شباجك دمع وذنوب
وارجف واستحي واعرگ واذل واخجل

وتكبر هيبتي شما يمك انذليت
حگي افخر لان بس يمك اتوسل

استحاله المثلك يحجم خطوته الموت
هذا انته بثنايه الروح تتوغل

احتقرت الموت من عافك نعش مشيول
من عدهه وكلت ع الموت مايخجل

جي يمك يحطني استسهليت الموت
صعب ع المايحبك بس عليّ يسهل

حگ من يختصر يم غيرك التاريخ
ويم سفره ضميرك سولف وفصل

من ارجعلك احس تبقه بگفاي الناس
بس يمك احس بالماضي مستقبل