نهاد الخيكاني
قارنتـك علـــي ويــة اليحــكمون
ولكيتك يا علي مفرط بلحــــــكام
شني تحكم الدنية وعرشك بساط
وشنو بجامع مقر القائد الـــــعام
وشني عود اليتيم يكــظلك البــاب
اليتيم ايروح يسكن دار الايتــــام
جا ماعادهه ولا كظـــــلك الــباب
كون بظهره قنبر يسحب اقســـام
كلشي ايصير مدري يفخخ البيـت
تحت مهرك ايجوز ايحطلك ألغام
علي شعـــليك اذا بالشام جوعـــان
دشـــبّع حزبك ونعلت ابوالشـــام
تكضي الليل تسهر وانته مسـؤول
السياسي الزين وي المغرب ينام
بين الناس تخطب يا ابوالحســـنين
علي المفروض تخطب من وره الجام
كثّر نوق واطلِـع موكب اويـــاك
وانشـــر عالدرب رماية اســـهام
ناكة مظللة تركبهه ابو حســين
وعمار بن ياسر كــعدة كـــــدام
وخل مالك الاشتر كبلك يفـــوت
يكطع كون ســير الشارع الــعام
بدولتك هم جنت تنجز مشاريـع
وهم تاخذ مـقابل بصمة ابهــــام
فضة وقنبر اشكد ياعلي انطوك
حته اتــعينوا بالـبيت خـــدام
عقيل اشراد منك حته تــــجويه
اخيك هاذه ضمه الظــهرك احزام
كبل ماكو دمج ودمجه مــولاي
علي سجله سياسي مهدم الاصنام
شعجب ولدك ياعلي ماطلعو ايفاد
ددزهم عالبحر يكــضولهم عــام
دبرلهم عذر خـــلهم يصـــيفون
بحجت مـــشو دورة لنشر الاسـلام
علي تنطي خبز تتـــلثم اشبـيك
جامــا كشـفت وجـهك للاعلام
جا ما صار بينه الصار مولاي
وظل ياهو اليجي وكال آنه ابو لثام
