حيدر هليل

اني اعرفج انتي من هذا القبيل
ماتحبين الحجي وتكراره..
وادري من تصغين سمعج موثكيل
وحيل تنتبهين عالابشارة..
وهسه حجيي بعتبة زلوفج دخيل
وصرت  أهيس جن  احاجي  حجارة..
وادري بعتاب الولف يجوي الدليل
السمجة ماتعشك حجي السنارة..
صاير العاشك مثل طالب سبيل
والله مظلوم اليحب بت جاره..
يكضي عمره يلوذ بكتار النخيل
والنخل عين الفلح باكتاره..
وفوك كصته من الخجل وادم تسيل
ويلتفت ومحضرات اعذاره..
وعينه تنشد بالشبابيج وتعيل
وينطر الفانوس تطفه انواره..
والله طبكة بابهم تشفي العليل
وحيل تشبه طبكة المحارة..
واني حبيت بوكت بي مستحيل
تشوف ترجية بنات الحارة..
جان موضوع العشك كلش قليل
والخلك مبتعدة عن افكاره..
والغزل ممنوع بالرمش الكحيل
ولليغازل تندفع كفارة..
واني أحملج رسايل بالشليل
حجي ومن لب الحجي مختارة..
وهسه باقي ابابكم كلبي جتيل
ولين احبج ماأخذت بثاره..
وافتركنه ومانوينه اعلى الرحيل
والهوى بكلبين شبت ناره..
راح ذاك العود اليعبرني ليل
ياما جنت أثمل واكطع اوتاره..
موبدينا وعشنه كل واحد ذليل
المشكلة أهلج مو رباة اعماره