محمد المسعودي
عيوني تعبت ..صافنه ابعتبة كفاك
مرلي حتلو ايد بيد مگاود المني خذاك
جيوب حيلي ..فارغه مابيهه حيل
شلون بيهن ؟
ذكرياتك ظاله ابراسي رماد اگبال واحد سولته من ايعصب ينافخ عليهن
شلون بيهن
الملامح ظاله بوجهي حصير
تسلتت واحلامي چرچفهه گصير
خذني واشمرني اعله تعلاگة افكارك
ازغير وماكلني هجرك وين متخليني اصير
الشابع من الوحده يستجدي الحنان
غرفه وحده ابيتنه تجرحني ليش ؟
حته من ارد ابچي ماعدنه مكان
ينهش بروحي المرض ..محتاجلك
ضلوعي تشهگ عطرك ..واشتاگلك
بس تعال ..بداعة الحبيته غيري ..وغيرتك محتاجلك
الخد ..درب شيّاب بي طلعات لجدام اليفوت ..
وانته وجهك ثگل اول صمة تراب وتگع من چف عزيز اعله اليموت ..
التحق باللاوعي ..من اشتم ..ضواك
والله زحمه بشاربي تمرجح هوااك
روحي تتشگگ ..ظهر حمّال ..خبزه معرته بسنون الحصار ..
بيهه وحشه ..الضوه يخرمشهه وراك
الشيب شيشة عطر بي ريحة هواك
