نهاد الخيكاني

 عساهه بذمتك راح اترك النوم
اذا ماريد اشوفك يعني مانام
حسرة عليه اغمض جفني لحظات
كبل يم بابكم تاخذني الاحلام
واكلك غيرتك هم تقبل بهاي
عن طبكة جفنهه عيوني صيام
طحت يمك دخيلك راسي مطلوب
بمحكمة الشماتة اتحاكم اعدام
صدك ضميتني بس للاسف وين
على درب الشماتة بقفص من جام
الحمد لله عرفت شبيك مابيك
وميزت الحقائق عن الاوهام
كبل جنت من عوفك ظرف لحظات
كل لحظة التمر تنعد بالف عام
بس وداعتك هسه الوضع غير
تمرني سنين هجرك جنهن ايام
ردت منك سبب بي اقنع الروح
تتساءل عليمن ضيعتهه
الغشيمة المشتريتك بعلى الاسعار
على ماذا ولمن خايب بعتهه
اكولن ماجيك وكاطع وياك
عتبة داركم جا حلفتهه
من كد ماعليهن رايح وجاي
الك روس الشوارع كسرتهه
ومن كد مابابك واكف سنين
ارسومي بابك انطبعت شفتهه
لكيتك تستلذ لو دمعتي طيح
عصرت عيوني يمك وشلتهه
شفت دموعي خلصت بيش اسليك
طلبت عيون جيراني وجبتهه
على غيرك عيني سهوا عاينت يوم
ولو مابيه اشوفك جاشلتهه
واذكر مره اديه متدت عليك
غرت حتى من اديه وكطعتهه
اسف حجي العواذل هيج داراك
شجاك وبدلت بتراب داراك
ادور والدليل باب داراك
من كد ماسكنته انصبغ بيه