احمد خماس

نهار .. عيونك اتبــدي ..
وانا گبالك فقيــر ..
امن الشذر , من الضـوة , من النـار
ضلمة ولا شمـع عنـدي ..
وانا وياك..
ياخذنا ويردنا الليل !!
يالحسنك نهر مياس ..
روجه مكحل بناگوط من اخر گمر يحــدي .. وانا وياك ياخذنا ويردنا الليل ..
يمن لو جستك بروحي احسنه غريب الحيل !!
شحاچي اليگـبل عيوني ؟؟
واليطلب حزن شهـــدي ؟
يالــگدتك سهر من چفك و للغيم …
على مهرة فرح شـگــرة ..
الحدى اعلى ذيالها اليلهث .. جمر طشار !!
و توه الخوف ظل يبـــدي
صعدنا ويه الگمر ونصيح ..
ننزل للنهر ونطيح ..
گايدنا العطش عرسان !!
وتمد ايدك عفى اعلى الروج ..
واحس من چفك تخردل ..
انا ذاك اليصعد روحه من الماي ..
من بين الضفيرة الغازلت جرفه..
انا الحيرة ….
انا ذاك اليهز الطيف ويلملم تفاسيره !!
اشمك من تمر عالبال ..
و أهدل كل حياطيني ..
يملوحة حچي العربان ..
الندى لو طافك .. تناشغ فرض غرگـــان ..
يفيض الضوه من الشباچ ..
لو مر ليــل حارتنا !!
لـــهسه اتخيل بصوتك ..
يذاك الاحترام ابچهبة الكاروك ,,
رسومك دندشة طيفي
احفظنك حفظ عالغيب
لتالي النوم .. اتلمس ملامح وجهي بعيونك ..
اغمض عيوني واتهادد ..
واتگرب واحس مثل اليروح بروحه لمراية ..
يثلج الكاسرت كيفي
ارسمنك حرگتي وچلمة الافيش .. وبكيفي ..
يحوبة فوطة معگودة بنوايا الشوگ
صليتك گبل ماتوب !!
من چان بسلفنا يشور الفانوص..
من چنا اعلى نيتنا بزلال الطيش..
شني الظلمة؟؟
ما نعرف شني الظلمة ..
تاليها افتهمنا حرمة الظلمة ..
السمة تنگط نهارات بتواللي الليل..
والشفناه
غربيل الضوة الظلمة