بغداد حلوة تره
رغم الحصل والجره
حارسهه واحد الاحد
وماتبچي تضحك بعد
خل يسمع الما دَره
بغداد بيت الشمس
حب ومحنه وهمس
واللي يفكر يمس
عالموت يلزم سره
بغداد تبقه بخير
ولاماتصح للغير
دجلة وسماهه وطير
ويانه متحضرة
تداعيات وطن
رايد وطن من صدگ
بس كون الگه الصدگ
حتى انه اريدن وطن
ورايد شعب مو شعب
ياكل ويشرب فقط
رايد شعب ينتفض لو مر عجاف الزمن
ورايد بعد وشكثر
احلام من الزغر
كل يوم يطلع شمر ليـهسه متحققن
والمـاأريده نعم
راح انه اگوله بألم
والصوت هو القلم والورقه اسمع اذن :
مااريد بابي تدگ
تحرجني ما عندي
ومااريد عالارصفه الگه الصبح ولدي
ومااريد اعبر جسر والگه مره اتجدي
ومااريد ابن الوطن يحلم لِبس جندي
ومااريد فارس چذب مليت من الچذب
عبرن عليه گبل بس هسه ما عبرن
ولاتبچي ما اقتنع خبره صرت بالدمع
مكسور عدنه ظلع ويگلي لا عثرن
وعندي بعد بس طلب
عاجل لكل العرب!
اذكر عباره أمس
ظلت تحز بالنفس
“القاهره تكتب وبيروت تطبع وبغداد تقرأ”
ما تكتب القاهرة وبيروت ما تطبع لا احنه مو فقره
بغداد تكتب بعد
بغداد تطبع بعد
وكل الشعب يقره وكل العرب تقره
كل العرب تقره
