علي رزاق الركابي
يل ساعة فراكك جنهه ساعة موت
عرش حبنه شجاك بساع هزيته
راسملك صورطول العمر وياي
ما ادري اليحبك ينهجم بيته
عفتني وهاجرت ماكلت بيه شلون
وانه اسمك بنص الكلب خليته
شلت حبك نجم خليته فوك الغيم
ولابعد مكان هناك وديته
رحت وي غيري الله وياك محروس
تره عمر المسافر يحن تاليته
من تكلي احبك جنت حيل ارتاح
مثل الطفل من يفرح بعيديته
كون الماخذك ماينخدع بيك
مو مثلي غشيم وهم على نيته
ياهو القره براسك قصة فراك
مو اسمك واسمي بعلك شديته
باب العشك جان وياك مفتوح
كلي شبيك هسه بوجهي سديته
لتسولف وفائك وانته تمشي وياي
اليسمع بعمرك لجلي طشيته
انه بصري حرز بي من وفه العباس
ماخونن شخص فد يوم حبيته
انته بحضن شامت نايم ومرتاح
وانه بس تعالو الليل كضيته
جنت من تبرد انه بروحي اغطيك
بس عمر النذل ماينمدح صيته
