امجد سلطان
أحلفك بالخذك كرهني بيك وروح
وبعدهه محاللك لو رايح سنده
بده براسي الچفن وينك دنه الموت
تعال الحگ علي محتاجك تبعده
الهوه لمن عبر گاع الله وين يريد
ماكو انسان يشتم رايح شعنده
نار بكلبي بيهه الشمس نجمه ضيع
وشده بروحي ذيج التنحسب شده
وفشله بعيني فشلة زلمه حگه نباگ
عنده اخوان عشره وعارك الوحده
وسر بداخلي وماكوله لو للبير
انه صاحب عمر مو صاحب المده
بسبب دمعي انطبع بخدودي حافر خيل
وخطواتك مثلهه بكل ظلع وحده
الكلب بي دگه وحده وعافهه الملگاك
بس انته اليذلك كلبك يعبده
علي تبچي الثكاله منون تالي الليل
الم دموعي گوه وصبري يتبده
من امسح ادموعي بردني يوگع طيف؟
علي لتگول ناسي وقصر بوعده
مو مثل الخذوك بروحي ماي وطين
وعله شحة حجيهم روحك مورده
شوازاني وعشگتك روحي طيرة هور
حره بكيفهه وعل البردي متعوده
