علي الشباني
انبع شوك من تمرگ
يطك الورد بعضودي
وهيس كل خضار العمر بعيوني
ويطفح عسل بورودي
يلمشذر يفيض الروح مريودي
رچيج اگليبي يودن
وزم نگاده بنهودي
ايزت اويه الهوه الخزره
ولم خزراته بزنودي
يدنيه اشينگل الجدمه ذهب
يجدح ابدلالي عتب
يروحي اتعذبي ابدربه
ونودي ابهلعشك نودي
يمر ويخضر الخاطر
ينث الشوك بعضودي
ويطفح عسل بورودي
نده والليل متغاوي
تغيب النجمه بعيوني
اثلج والگلب يابس
يمر لو ليه تودوني
غرك صبر غرك ياناس
ثلمت الگلب حرگه
تنيت ورهن بالسچه
تظل الروح للملگه
ولا عنده گلب يخفك محنه
وينفر العشگه..
ولا حس ديچ وعه النوم بعيونه
ولا نجمه تذچره ابشگره مرهونه
صهل بفادها عشگك
لفاهه الضيم من دربك
جدس حسبات بلچي اتمر
تمر ويخضر الخاطر
ينبث الشوك بعضودي
ويطفح عسل بورودي
يلمشذر يغيض الروح مريودي
يلمشذر بعيد الشر
