عبد الحسين صبره

بحشاشتي سهمك مضه
وعگبك علي ضاگ الفضه
اللي حظه ابوصلك حظه
والما حظه يا ولحظ
حظه ردي او عمره اخسره
اللي الشخصك ما يره
جفني امعيي امن الكره
ما استلذ عگبك واغمض
ما غمض جفني او لانشف
دمعي او روه كل السلف
ما تم الي غير الاسف
متسلي بابهامي عض
عضي على حبك فرض
واللامني ماله عرض
لو نوخت نوگ الارض
ما اظن ابحملي تنهض
لا نهضت او لا شالته
ومدريت ولفي اشرادته
فضة الگيظ امن الشته
هم هشكل حبنه انفض
فضت وحگ مكه او منه
وظلت الروح امدوهنه
انه العله راسه بنه
عش الغراب او بيض
بيض يولفي ابهامتي
والمحب حار ابعلتي
طالت اوعرضت قصتي
وبالصبر گمت اتمضمض
فضت يناهي خوتي
ونسيتني يا منيتي
اتدارك يولفي علتي
گبل ان اتطول او تعرض
عرضت يناهي واتسع
جرحي او دوه بي مانفع
ما صاب ايوب الوجع
مثلي او جسمه اتمرض
بالمرض مرمي والبشر
ياهو اليصد ليه ابتشر
رض الگزاز اعله الصخر
ضلعي يمدلول انرض
مرضوض ضلعي وانشچل
لساني او دنه مني الاجل
منك فلا اگطع امل
لمن ايلفني الابيض
الابيض ايلفني او لو طره
ذچرك اون تحت الثره
خليت روحي امحيره
يوم الذي ضعنك شظ
الشظنه ريته ابلا نسل
چي گطع حبلي المتصل
روحي شاوصفها مثل
سعفه ابهبوب او تختض
چالسعفه اختض او ارتعد
ايه وحگ اية الحمد
من اعرفت ناوي تصد
او عني اتغض طرفك غض