ناظم الحاشي

 كالو…بيع صوتك…كلت لا..مابيع
وعرضو مغريات اتحقق أحلامي
ظنّو جامتي بس تنصدع تنهار
اوراموني اوحجرهم ماصدع جامي
تره الشايل قلم شايل شرف بت بيت
ونه الحاميت عرضي الشالته أقلامي
وجوني اوساوموني اوماجبرني الجوع
أبيعن ماي وجهي الخدم خدّامي
وآني امن العسر جلد وعظم ظلّيت
وبعضهن من جلدهن طلعن اعظامي
صايم جبت عمري وجوعي صام وياي
وجه وكت الفطور اونمت بصيامي
ولا مدّيت اديّه السفره لوماعون
اذا ماينملي اويتخلّه كدّامي
جابوني البحرهم من درو عطشان
اوظلّيت اعله جرف ابحورهم ظامي
ولادنّس شفايف باسن العباس
وحلفن بالولاء الحيدره ايمامي
ما أعبد عبيد المال والتيجان
واللاّت اوهبل ماعادن أصنامي
واذا كالولي وقّع للحرامي بيوم
أكص اجفوف اديّه الشالت ابهامي