نهاد الخيكاني
ها يكلبي ألوحدك ناسك نسوك؟
الناس ريح وماأتدوم أحوالهه
وأنت تدري الريح ماتثبت تميل
لاتكول الناس مدري أشمالهه
ياما كتلك ناس ألبالك تعيش
ماتمر انت أعلى عتبت بالهه
الماي عدهه ورضت بستانك يموت
ونت دم عنبك أبجف أسلالهه
حتى شجرتهم لأن يمهه غفيت
صاحت الحطاب كص أظلالهه
من يذكرونك بعد كلهم نسيت
وطيبتك لازم تشد أرحالهه
جني أعلم خيمه كاتب مابنيت
أعلى التراب وراح أجز أحبالهه
كون تعبك للعدو هم مايضيع
ولاتصير أحوالنه أبها المستوى
غير كلشي الينطي ياخذ بالحياة؟
حتى سم الحيه بي موت ودوى
أدري تمرك ماأيغزر شي عجيب
أني أدري أبكاعنه أتملحه النوى
فوك صدرك دوس داسو موحفاة
ألأمس عدهم جنت اقدس من طوى
شأترف من الماي هم ايصيبه غيض
وغيض عين الماي والمعول سوى
الماي من تكعد على صدره الجبال
أيضيك صدره ويطلع أيدور هوى
هايكلبي أتصيرلك عبره وتتوب
اني أعرفك زين ماتصبر ترد
شافو أبدربيلهم تطلع قريب
دارو الدربيل خاطر تبتعد
ولأن يدرونك ندى وباجر تطيح
خضرو عاكول ماصارو ورد
أبيا جلد يالطبت أعليك السهام
ولك هي أسهامهم خلت جلد
ليش ياسيف اليجي ودليته بيك
جني ماشايل كلب شايل غمد
انت لوكلبي وتظل سيد هواك
هذا موكلبي اليظل عايش عبد
