حسين المحمداوي
بعد ان اوشكنا على اخر جرح
لم يتبقَّ سوى الــذكريــات
بعد مابينة ملكَة ونرجع اثنين
رجع واحدنه لابس ثوب حزنه
شربحنه من العشك بس لذة فراك
غير نموت حتى نكول عشنه
ليش الفقر حاجز لليحبون
وعلى اوتار المواجع يعزف النه
العش شكد بسيط وحقق احلام
العصافير اعله نيتهن بننه
القصر ماله علاقة براحة البال
بحضن امي من انامن عدي جنة
تره الجنحه انكسر ثق واهسه يطير
جنح وبغير واهس ماله معنى
الامس جف حبيبه بنية فراك
باجر يجوز ايده تعوف ردنه
لان تربات ملكة نكره لوداع
ميت ما نــــودع طبع عدنــه
خاف نودعه ويحسبنه عفناها
نكول يجوز باجر يرجع النه
اليوم فراك عدنه نقيسه بسنين
مو بينه الذنب تربات اهلنه
وصلت بينه وصينه اليصلون
بلكت ننجمــع تدعـون النــه
للشايل بروحه احساس سجان
من نحجي بترف ما يفتهمنه
والشايل بروحه احساس فلاح
من نكله وردة يصفك النه
هيبتنه كَبل تحتاجه شيوخ
هسه الذلة مرسومة بوجهنه
كبل من ننسئل ونجاوب بخير
هسه مدنكــين ونكول جــنه
