سلوان المحمداوي
اشمهز چفي اثر لمسات منه ايطيح
واضحك .. وابچي رأسن واختلي اب.. بالي
اعصره ويصفه خابط .. والمواقف طين
واتناوش حچي من الهوه العالي
واسمع صدى ايامي الماتريد تعود
بحضن عين الليالي احلام تبرالي
ادگمن جدمي لو باب اليدور وياي
وأنه ماداگ گلبي گبال چتالي
لو دگ چفي واصفك راح .. عالماراح
واراوس خنگتي بضحكات عذالي
انه امن اصفن احس من راسي يطلع بير
مابي يوسف و من سري مو خالي
اون والسمه اتدنگ والطيور اتييه
وافرح والغراب ايحط على اخيالي
يستغرب المغرب لمن روحي اتهيم
وبيت اهلي گبر گام ايتراوالي
گضه عمري اعله غيري ومات لمن مات
ومدري بيا عمر لوعيش بالتالي
مچودر عمر بيه ايملكه غير انسان
يذمني وما ارد چي عمر مو مالي
الليالي وطولهن صارن عليه اگصار
و أگدر لچن بس تفكيري كفالي
بوحشتي الحسره ترسم صوت للدخان
ويتعاتب ابروحي العالي والغالي
امسودن واهز ايدي .. وبالي مدري اشبي
واحط چفي اعله عگلي ويصفه عبالي
وانه امن احتاج ضحكه.. بجفني ارسم طيف
واحلم واني صاحي ويرتبك حالي
اهز ربعي ال..بگلبي ولمن يطيحون
اغش روحي واگلهه الگلب مو خالي
اتاني الما ذكرني .. ومانسيت اگفاہ
واسهر مطمئن .. واتشاءم ابفالي
السوادين الشلتهه امحيره چم مجنون
صح هواي .. بس چم خيط يحلالي
يطشني البييه الم .. واللام گلبي ارتاح
لحد ما بالحچي المو زين غنالي
وارد واضحك بجي .. واحلم بصحوت كيف
واغش روحي واگلهه الگلب مو خالي
