حسين القاصد
هاي الكلمة لكَيتها مضكورة بالكتب واحتاريت بيها لأن اغلب الاعمام ماوراهم بس الطلايب ، ودائما كلما تصير طلابة اجاك واحد امعدل وكَال حضر أعمامك وحول !! تكول عدنه مولدة وكل شوية طلابة وكل شوية تحويلة .. ماعلينا بالحكومة لأن الكهرباء صارت زينة والمولدات رخصت اجورها بس سالفة الأعمام قديمة كلش ويكولون بس واحد خلص منها وهو جدنا آدم لأن ماعنده أبو مو انوب عمام !! وكلنه نعرف سالفة ابو لهب وامرأته حمالة الحطب .. وفوكَاها ابو لهب تبت يداه وتب .. والعرب يحبون نسب العمومة ويكرهون نسب الخؤولة ( والله كَايم افتهم مو ؟؟ ) بس ذاك اليوم رحت لأحدى الوزارات ولكَيت لوحة في باب احدى الغرف وفيها كتب رسمية واكو واحد من الكتب عنوانه (أعمام ) !! دخت كلش !! كلت معقولة هاي الوزارة توزع أعمام عالبطاقة التموينية !! لمن استفسرت وكَلت بلكي احصل لي عم حتى لو نص عمر !! بس المشكلة هي : واني ( عم بسأل !! ) طبعا بلاد الشام لهجتهم هواي تصرف اعمام .. كله عم باكل وعم بمشي وعم بحبك !! ماعلينا بالوادم وعمامهم .. المهم لما سألت طلع الكتاب معناه (إعمام ) يعني الهمزة جوه مو فوكَـ .. هسة هذا هم كرسي !! صدك عود ليش الهمزة عدها كرسي وتعوفه وتطلع تتمشى ومحد من الحروف يطالب بشراكة وطنية !! أويلي عالهمزة .
