حسين القاصد
الهزة مضكورة هواي .. وحتى اخو هدلة من كثر الاهتزاز جان يريد حتى الشوارب تهتز .. ويكولون بالتعذيب اكو كرسي هزاز … لأن الجماعة ماعدهم (بُطل) فيكعدون المتهم عالكرسي الهزاز .. لأن عالبطل مايكدر يهتز ولاتهتز شعرة منه !! لاتفتهموني صح عفية ، اي .. وراح وكت واجه وكت وتحركت الصخرة من مكانها واهتز كلشي .. اهتزت المبادىء والقيم وروح النصر والمثيولوجيا ( لا هاي الاخيرة مو وياهن ) .. ومانشوف الا واحنه بنص الحرب الطائفية وجان بطل التخريف القومي بيها واحد اسمه عدنان الدليمي وجان هذا اربع وعشرين ساعة بس يهتز .. يكولون مرة جان كاعد بفاتحة وصبوله كَهوة .. والكهوجي انطاه بس فنجان واحد وعافه وراح .. والوادم صاحت بوية ليش ما انطيت عدنان الدليمي فنجان ثاني ؟؟ كَال : شمدريني شفت إيده تهتز عبالي اكتفى !! ماعلينا بالعالم .. هسة ليش ماخلو الصخرة بمكانها .. لأن حتى شباك مرمى المنتخب العراقي شبعت هز ويوميه هازينها .. عساها بحظ الرئيس المخلوع ناجح حمود ولايهون حكيم شاكر .. اخر هزه للمرمى العراقي اجتنه من السعودية واخر مطرة من السعودية .. همزين يعني هاي الامور مو اعتباطية وهي استمرار للمؤامرة الاقليمية على البلد !!.
