حسين القاصد
القائمة مضكورة بالكتب وهي احسن من القاعدة !! ولو اكو بيناتهم خط اتصال لوجستي (ايباه صار شكَد ماكَايل لوجستي !! ) المهم ، والاخوان بالقائمة المسلمين والمتأسلمين ومن لفّ لفهم ومن أخذ (سفري !!) كلهم متحمسين لهاي الانتخابات ومحضرين دماء جديدة لهاي الدورة (مو تفهموني صح عفية ) الانتخابية .. وبالسياسة ماكو حرام حتى الدم مو حرام ولا الميتة ولا لحم الخنزير لذلك لابد من دماء جديدة والقائمة ماقصرت كَامت تتسابق وي القاعدة على (فجران الدم ) استعدادا للانتخابات القادمة وبهاي الانتخابات يجوز يطلع عدنه (فرخ نائب ) مثل ( فرخ كوستر ) وفرخ البط عوام !! لأن بالانتخابات السابقة اجت ام حاتم ورشحت رجلها ابو حاتم وفاز وهسه وصل السره لحاتم .. ماعلينا بالوادم . يكولون القاعدة هم تريد تنخرط بالعملية السياسية جنبا الى جنب وفي خندق واحد ضمن جبهة واحدة ( يابويه شكد يحبون اسماء الحرب .. خندق وجبهة !! ) ويكولون اذا انخرطوا الربع ورشحوا حتى الفروخ الجدد من اجل الدماء الجديدة راح يتحالفون ويشكلون حكومة معارضتها منها وبيها .. وتقصيرهم على ازياكَهم ! يعني بالانتخابات الجاية راح تفوز الدماء الجديدة والدماء الفاسدة وتنصهر في بودقة واحدة !! والسؤال هو : البودقة علينا لو عليهم ؟؟
