حسين القاصد
اكثر شي مضكور بالكتب هو مجلس الامن وچان يومية قرار يجيبنا وقرار يودينا ، والامن مزعج جدا اذا موجود واذا مفقود ، يعني مثلا يگولون والله گَبل احسن چانت أمان !! اي بويه چانت امان بس بالاسم لأن الامن هو المرعب !! يعني چان اي واحد يحط دفتر بجيبه الورا ويبين من ورا القمصلة كأنه مسدس يگَدر يخيط ويخربط .. والى ان انهار الأمن الوهمي مالهم والوادم تنفست .. وبدت الحياة تضحك للعراقيين وفجأةً تكالب الارهاب وي ذوي النفوس الضعيفة حتى يزعزون الامن وانفقد الامن وازداد القلق .. وطيلة هاي الفترة چان مجلس الامن خارج المتن لايهش ولاينش !! ومغلس عالوضعية .. والعراقيين يتعرضون لحملة ابادة جماعية وهو مو يم السالفة .. وبكل هاي الظروف بقى رجل الامن العراقي يحارب كل اعداء نجاحه من الارهاب الى الاستهداف الشخصي الى الحرب الاعلامية الشعواء .. واليوم اني من الصبح سمعت بالراديو ان مجلس الامن يدين الارهاب الاعمى ابن الاعمى ويشيد بجهود القوات الامنية في العراق وتصديها للارهاب .. لذلك نهنىء قواتنا الامنية ونشكرهم على كل جهودهم ونعزي الارهاب العالمي ولاسيما القاعدة والاخوة بالقائمة … ! بس لاتفتهموني صح ، ترى ما اقصد قائمة (بعينها) يجوز بغير مكان !! اوووه هم راح يفتهموني صح .. چا خوش .
