حسين القاصد

والبزاز كلش مضكور بالكتب .. وحتى بالقراعة الخلدونية مال هذا الطفل خلدون بن حجي ساطع ، ماعلينا بالعوائل !! واللي يعجبني بالبزاز هو سالفة (گابله بعينه وبزه) ، وگبل أهلنا چانو مايگولون نضرب إبرة !! يگولون نبز ابره ، واحسها أقرب للفصحى لأن البز يولد ابتزاز والطفل گبل اذا نريد نبتزه حتى يسكت نهدده بالمضمد حتى يجي ويبزه ابره !! والبزاز فرحان لأن گضى عمره جوه الدرج .. لحد الان كل علماء النفس وحتى المرحوم سعدي الحلي ماعرفو سر علاقة البزاز (المضمد ) بدرج العمارة ، المصيبة حتى لو العمارة فيها محلات فارغة يكتبون لوحة المراجعة مع البزاز العفو المضمد (جوه الدرج ) ، ويبقى هذا خاتل جوه الدرج ويتصيد بالماي الصافي كلللش ! لاتفتهموني صح عفية .. نرجع لسالفتنا ، يگولون راح وكت واجه وكت وچان زلمة شايب متدين عنده انفلونزا ورايد ابرة خبط حتى يشتغل على قائمتين.. !! ولمن ضربه البزاز ابرة ايقظت عنده الوعي التعبوي المتدين راد يرد الجميل مال الدرج وسأل البزاز وگال المرافق اللي جوة الدرج شرقية ؟؟ فجاوبه : اي .. فرح المتدين ودخل وبقى يصرح براحته !! وتضكر كل امجاد الدولة العثمانية وعبد الله المؤمن .. ولما ارتاح طلع وگال للبزاز : عمي انت خوش ولد وفاسق وابن حمولة 8 طن !! وانت مضكور بالقرآن ، يگول ( اذا جاءكم فاسق بنبأ … ) وانت كاعد جوه الدرج وكل الاخبار يمك .. روح بفالك بس ديربالك عالمرافق الغربية لأن اذا يشوفها ابو العمارة يطلعك من الدرج ويتهمك بالعمالة !!

چاخوش !!