حسين القاصد
اليوم اريد (اتضكر) كاظم اسماعيل الگاطع ، لأن الوادم ملتهية ومالها خلگ تضكر واحد من أهم اعمدة الثقافة العراقية وهو الشاعر الكبير الگاطع في ذكرى وفاته ، وابو وسام اعرفه معرفة شخصية ، وچان دائما خايف ، وشابع خوف ، يفتقد للامن بعز الامن !! ، ويخاف على البلبل من القصر ويخاف على الرسام لأن الرسام دمه الصبغ ، وابو وسام يحب المدارس ويريد حتى الاطفال الميتين يگومون من يگول المعلم :(قيام) .. مو گالو قيام وليش ماتگوم .. وبين الخوف والقلق والبلبل اللي لازم يقرا نشيد والناس الميتة من الجوع .. نشوف ابو وسام يكره النظرة الدونية من قبل المسؤولين اهل القصر واللوحة والحمايات والخط العسكري !! ويگول:
هاي الناس شي تلبس كلبدون وشي گطع لبسها البرد والطين
تاج العافيه مو ترس البطون ها گده الچتف عند المجانين
اذا غاب الامان من اليشبعون يصير الزاد بالبلعوم سچين
مو شرط الفرح عند اليلمون مريض النفس ما يشفه بملايين
دنيا واخره نتحاسب شلون؟
مو گالوا عيال الله المساكين؟؟
تورطت لمن گلتها .. عيدك مبارك سعيد؟
لملموني وطشروني وظال بس اصقل واعيد
ادري بيه جروحك انته يا جرح عندك جديد؟
بلبل بحنجرته شوكه تريده يقره لك نشيد؟
شلون يقرالك نشيد؟
.. رحمة الله على روحك ابو وسام.. بس كون يسمعونك اهل الچتاف الكبار ويبطلون من تصريحاتهم اللي حرگوا البلد بيها .. واحدهم حمايته فيلق وماعدهم شغل بس التصريحات وانتقاد الوضع الامني اللي أي تدهور يصيبه هو بسببهم .
