سعود الخفاجي
ادك بابي اعله روحي وكلي الك ملهوف
وكون انته التدك بالباب كون انته
جاجيتك ركض وبروحي احطك روح
والباب اعله مــــودك كله جاشلته
الهوه عندي من اشمك ياهونته
وتهـون بعين خلك ياهونتـــــــه
ادك بابك تكلي ياهونته
انا البابك عمه عيونه اعله اديه
يالعشتك حلم عشرين عمر صباي
وبطولك حلم عشريني راوسته
مفطوم اعله طولك سوله بالمفطوم
عينه لصدر امه وهيه فاطمته
عطشانك فرح والفرح كلــــــه اوياك
شيضرك ولو لوكلبي فرحته
صفاني الدمــــع ومنين اجيب ادموع
وابجيلك حزن واستعطفك حته
عميت وكمت ماوجـد وظليت
طريجي وايست منك وظليت
اعالج بالنفس عكبك وظليت
تجي وبيدك تنكط الماي اليه
علمنـــي الكلب شنهو انته من اشتاك
وانــه اعله الصبر والتكضي علمته
وعلمني الجدم لوجل اجيك زحوف
وعنك هالجدم مايوم كصرته
اشبده وشوكك لخلك منجفيته
وعليه شكلت بالله منجفيتـــه
سهم غدرك كتلني منجفيتــه
بدليلي ولاخطه من اكبل عليه
تانيتك عمر وبجفـــــــي شلتك عود
ولعودك امس دم كلبي رخصته
وداريتك غصن وبسدي جنت تلوذ
ظل اوياك اشبن واحترك سكتـــــه
كل بارح يمرك انه الك نيسان
وانته بنص خريفك كلبي يمته
حلم جان بخيالي مرعشته
ودفه ضلوعي بغيابك مرعشتـه
رعش كلبي وعرفته مرعشتــه
مورعشه صحوة موت رعشة دليلـــي
ومن شفتك من بعيد كمت اعله حيلي
وناطرتك فجر واسمك نهايــــــة ليل
ينطر الفجر متكلي يايمته
لاباجر يجي ولاليلي عني يروح
وبعيني الصبح مطويه سالفتة
ميت وشتظن اقتنع من يعيش
وانه الكبليته وبيدي جفنته
بصليل اشتاي واشتاكك دفنته
دحن دشتاك لكليبي دفنته
وجوب الميت عالمسلم دفنته
