محمد المسعودي
انته مو عالي ولا فد شي جبير
واليكلك عالي ما عنده عقــــل…
لا اكف عنده عقل بس هوه هيج ..
التله طبعا عاليه ابعين النمل..!!
وانته صح ابيض وجه..بس مو قياس.
الشيبه كلش بيضه بس باطنهه ذل..!!
انته اذا بس مكتفي ابخمسة حواس..
انه سبعه…. ثمانيه ..مالايقل..!!
اعرف هلال الشهر قبل الظهـــــور..
واقره بعيون الشمس يمته يهل..
ابدكت الباب اقره سالفة الصديج..!!!!!
واعرف من عيونه صالح لو نذل…
اكحيله اذا يم المهر اوكف..نشاز..!!
ايضيعن ايبينن شلع كلهن هزل…
انه اخير ومو شرط ذله الاخير….
الشاعر البيه لزمه خاتمة الحفل….!!!
دور اجروحي شكثر تلكه اصدقاء..!!
موته بس المشكله احساسي عدل..!!!
جروحي كلهن زلم ما بيهن زغار…
جن عراضه جروحي صارن بيهه جل…
وافك بين جروحي لليطعن مجال …
مثل ما بالهوسه ينفك الحبل …..!!!
انه شايلك خلك عاجر تكول…….
ابروضــــــه رايح راد من يمهه الطفل….!!
الناي متوارد تره ومو صوته هاذ…
ابوني طارق صوته حاجي من قبل …!!!
انه عكده الصاحي ما فل بيه شي …
وانته الاعمه وجايني ورايد تفل ….!
وجايني تعلمني عالدرب الصحيح …
واحنه ولد المنطقه وانت النزل..؟؟
انه احوك السالفه حياكة اصيل ..
مثل ما حبوبتي تحوك الغزل..!!!!!
عمري سبع سنين خاويت الشيوخ
وعمري سنتين وطلع سن العقل…
