عمر البحر
رجعت اشتاك لأول موعـد وياك
من جانت مطر والطين ماليهه
بطيت وكتلي باجر سولف البيك
مشيت وكمت اتاني ابيش الهيهه
كلمـة شوك جانت جوه الشفاف
واكولن يمته باجر بذنك احجيهه
رحت للبيت انامن والشته يعيل
وانت اتعيل بيه اشلون تاليهه
يجي محمل حضن بطيوفـك الليل
ونده الشفتين ذاك المن تلاكيهه
احتر وانت ترجف هيج ميصير
خل نشتعل شمعه وحيل نجويهه
تره اللي توه عاشك حوبته وياه
اكلك خاف روحه بيوم تاذيــهه
حِنِين وكاضي عمره يدور احساس
عاشك كون مثله وعينه يمليهه
سوالف شوك هاكد شايل وجاي
لا حاجيهه كبله ولا سمع بيهه
وينك شو بطيت اتأخرت ليش
موش احجايه عندك خاف ناسيهه
موباجر كلتلي احجايتك ذيج ؟
وعله طكــت بريجك جاي اتانيهه
اني وريـج ناشف والفجر لاح
ولهفـة روحي بسمـك كمت اغطيهه
دخيلك خاف تبـــــــرد لمن اتعود
دفو الشبكـه الرسمت اشلون اسويهه
هسه وهسه يجي ولسه ماجاي
كضه باجر وفشله ابيش اغطيهه
خاف الله يولفي ومني لتخاف
بس اخر احجايه وراح اخليهه
عله عيونك عفتلك ملكـة ماصار
وعله عيني القصيده وحيل راعيهه
