اسعد الزيدي
بعدهن بالعباية اجفوفك مجلبات
دنك كلبي الك بس لهفتي اتسبكه
اهز كاروك طيفك من تمرني ابليل
وبكماطك اشوف احلام مختنكه
اصبع من ايدي وي كل ظرف وديت
اخاف اتصير وحشه اطلعه وتعلكه
حسبالك حرز لوعلك زندك شال
ﻻمشتبه شيله ابزندك امعلكه
لتأمن الدفو شمافصلولك صيف
اذ ا يبرد ضميرك ياحضن تلكه
وجهي امرايتك بالغربه وين اتشوف
وجهك مثل وجهي مابعد يلكه
ما عاتب سعف وادري البعد تنور
النفس دخان يطلع ساعة الحركه
اخدودي من البعد صارت مثل ميدان
وفرس دمعي اصيل ومحد ايسبكه
يمه من الحزن خضر ابدمعي السان
لكن بين ادي تتخورس الصفكه
اعيوني اتحجبت كل الوجوه اغراب
ونظرتي امجتفه ياوجه دكه
ما احب الضحك شيب اعلى شفتي
ايطيح وتجاعيد ابجلمتي من البرد زركه
ﻻتبخل ابد دوس اعلى ظهره وفوت
خلك كلبي بحر ماينوصف غمكه
على بختك ييمه شلون ترضه ابهاي
جدم غيرك يدوس الكلب ويسحكه
عاشكتك ورد لوشوف طولك ﻻح
فراشه اتصير روحي وتاخذ الشبكه
وشلي ابجيتك كونك تريد اتروح
اكره كل لقاء ايمهد الفركه
شجره أوأمنت ما ادري هيج ايصير
تمر نسمة ربيع تفرفح الوركه
ماراعيت كبري ودمعي من زتاك
ماردتك من عين الجرح شهكه
اثم علراعي لو ماكسر كلب الذيب
الناي احساسه يوكف ياخذ ابحكه…….
