انيس العيساوي
الى من هي أحوج الى علي بن ابي طالب عليه السلام امرأة تسكن الرصيف في منطقة الكاظمية المقدسة قرب بوابة بغداد ،اهلها واهل زوجها المقتول رموها الى الشارع هي وايتامها. لم يعطوها غير ((كشك)) كتب عليه هدية مؤسسة الحوراء الاسلامية
جكاير باعت و ما سألت الناس
بجكاير مفرد و حفظت شرفهه
بس ام الجكاير تعرف الناس
باسمهه الرسمي لا محد عرفهه
عده اثنين بألف ما نطقت بيوم
تخاف الحجي ياكل من جرفهه
نهر عفه و عليه عطشانه الارواح
و صار اسنين بس محد غرفهه
ولأن صارت اخلاق البشر عملات
عملتهه الشرف محد صرفهه
بظرف حطت ظرفهه وودته لفوك
وعليهه شكد يناشغ ظل حرفهه
ملتهيه المراجع بالزناجيل
وصار اسنين ما فتحوا ظرفهه
منزلهه الرصيف اتفرشه و تنام
تخاف الحرب لدوسة بسرفهه
ما عدهه غرف صاحت يرحمن
السعف و اعيون الله امسن غرفهه
ضواهه الكمر تتعاجز اتطفي
جنازه من التعب ليل التنامه
ميكعدهه نور الكمر لو ثار
ميكعدهه لو يوم القيامه
يتاماهه بحلم باجر علي يفوت
ويدللهه مثل ذيج اليتامه
ما ميت علي بس علي مجروح
وموش بسيف مجروح بعمامه
الما يفكد رعيته شفرقه عن ذاك
الطبر من علي بفجر الجرح هامه
