علي كاظم الصبيحاوي
يضلع الأه نام هنـــــاك
عله تراب المكَـابر جن طفل مجتول
بعينك روح بس يا روح
تتجاره بدمع مشلول
شهودنك عله اللجمات
خايب نوح……ظل مطروح
دنيا وكَضت مامش زين
بس ونه ودمع وجروح
خايب نوح
اهدل ثوب عمرك والطم الايام
وعليها اثار جفك لا تخلها تروح
وبعدني……..
بعدني وياك الوليلك
ببحة صوت اناغيلك
يضلع الأه وجم دوب
يبقه الحزن يجريلك
دشيل بهيمه مامش ناس
لا جف باب يطرقلك
لا لهفة هوه او لا طرير اجراس
بهيمه هناك وحدك عاشر الناي
وظل اعزف دمع حد ما يهزلك راس
لتخاف الحيايه الركَصاها الناي
تولاها القهر واستوحشاها الليل
هوه القهر شتظن هم يخلي احساس
يضلع الآه
الله وياك من امشيت
لتودع بحايط لا تودع باب
روح هناك وحدك عيش
مثل غربة عروس وسكنوها اجناب
صم اتراب….. صم اتراب
اخذ وياك صم اتراب
فرزن بيه
لعب اصباك
جدم اهواك
سوالف دهرك الجذاب
كَبل شتريد يو شبيت
ونسطر اماني والدليل اكتاب
ومامش باب… مامش باب
حطينه الاماني بحفره مدفونات
مثل حامل معسره وتطلكَلها بناب
وبس صواب
ما شفنه الفرح لا طاري هلهولات
بس ليل ونهار تعاوي لينه اذياب
وياهو الطاب
من خنجر دهر وتوازروه الكَوم
هوه الدهر عاهر ما عليه اعتاب
يضلعي هناك روح هناك
لا تسمع طرب لا تقره للسياب
ما فادوك من عابيت
بس تقره وتدور عالولاك اسباب
وبشرك لا تدور خاب
يغلق باب يفتح باب
كالوا بعد لا ترتاب
وبشركم ادور سنين مسدودات
تالي اعرفت بالضمون
بالقرآن
مامش باب…. مامش باب
