عقيل العرد
الليل يخلص بالمدافع ,,وطارش الباجر لهسه بلايه حس
والصبح ماسوى شي ؟
رجع لينه بشمس امس
هي حلوه هواي بس مالي نفس
الدنيه ما ادري عرسمن ؟؟
وخاف اهز جتفي ويفلشون العرس
وهي مدري شلونها الدنيا غميجه
وعاشت ايده اليفتهم ناسه ويماشيها بدغش
وعاشت ايده الخامل الكَمره وصبغها
وعبر اعله الغشمه جم اربعطعش
بوكت ذيج الوادم الدنيا فطيره
بوكت ذيج الوادم المتروسه غيره
جانت الديره صدكَ معناها ديره
وجانت الجف ماتغمض كَبل لاتغفه الضفيره
وجانت الدنيا اعله واهسهم جبيره
والمحنه اتطش سوالفها اعله وجه الناس طش
وبين هلهوله ورصاصه جانت النخوه تزتنه بفي نعش
وبضفاير نخل اهلنه تمرجِح الكَمره ضواها
والشمس بخدودنه تسير سمار
لون تستثكل سماها
والمناير جانت تغني لاهلها
وتطربلها اركَابنا وزفتنه نخوه
ويركَصلنا الموت من يسمع غناها
