حسين القاصد
طبعن اني مستغرب من صالح الحمداني يمكن يغافلني من نروح للصلاة!! ويخلص گبلي ويروح يفتش بالكتب !! لأن مامعقولة يقع (الضاكر) على الضاكر ) مثل جماعة الحافر (أجلكم الله !! ) ، رباط السالفة .. اني البارحة قررت أنام ليلا حالي حال الوادم .. وما احس الا الزايرة تتسلل وتجي بالظلمة وتجتاحني اجتياحا كاملا !! ولأن الكتب كلشي مضكور بيها اليوم فتشت الكتب ولگيتها بديوان ابو الطيب المتنبي ، يگول :
وزائــــــرتي كأن بها حيـــــــــاءً
فليـــــس تزور إلا فــــي الظــلام
بذلــت لها المطـارف والحشــــــايـا
فعافتـــــها وباتت فـــــي عظامي
يضيق الجلــد عن نفســي وعنــــها
فتوسعــــــه بأنواع الســـــــقام
أبنت الدهـــــــــر عنـدي كـل بنـت
فكيف وصلـت أنت مـن الزحــــــام
جرحـــــت مجرّحـــاً لم يبــق فيـه
مكان للســـــــيوف ولا الســـهام
واني راسا تضكرت سالفة كواغد وشكاحي ..وگلت هذا صاحبي تعلم من المصلين گام يبوگ .. واني من اطول بالدعاء والتهجد (صحيحة التهجد موووو؟ ترى اسمع بيها ماشايفها) الى أن تدمع عيناي !! ومااحس الا صالح الحمداني يتسرسح !! .. سألته : هاخوية وين چنت ؟ گال مو انت سالفة الدعاء مالتك تگول عندك امتحان ولازم تضبط الحركات .. فگلت خل أتمشى شوية لمن يخلص صاحبي .. بس اليوم من الصبح عرفت السالفة !! لأن گعدت ولگيت الزايرة مالت جدي المتنبي الله يرحمه ويرحم موتاكم لگيتها تنبش بعظامي .. لاأگدر اگوم ولاأگعد ولا اسولف .. واستحي من زوجتي خاف اگول الزايرة اجتني خطار وتتسودن مرتي .. المهم الزايرة ماقصرت .. فصختني .. صخونة على نحول .. على مدري شنهي !! وهاي (المدري شنهي ) اوجعتني حيل .. زوجتي گالت اسويلك ريوگ؟؟ چا انت مو متواعد وي صاحبك بقناة العراقية الثانية علمود تطلع في برنامج (الافكار الى اين ) گلت : خايبة خليني بضيمي اني الافكار تاخذني وتجيبني .. واني اخابر صاحبي ابو العراقية واعتذر منه !! .. ما اطولها عليكم .. خابرت صاحبي ابو قناة العراقية وگلتله خوية اعذرني ترة عدنه الزايرة خطار وزحمة منها .. واذا تريد اتصل باستاذ علي الفواز وهو مايقصر .. وبقيت يم الزايرة ونمت وهي مستولية على عظامي استيلاء تام .. بس همزين مرتي ماتشوفهاچا شسخلصني .. بوية عساها بحظ صالح الحمداني هو وشكاحي چا ما اخذها وي كواغد وشكاحي ؟؟ لو تركها على گلبي لأن تبات بالعظام ؟؟!! اويلي على المتنبي.
