حسين القاصد
من المضكورات بالكتب يكولون ان الأمن استتب تماما في الارض قبل ستمية الف سنة ، والقاعدة مال كبل شردو للبحر وهددوا الاسماك ورادوا يجتثون الحياة من اصلها لأن رب العالمين جعل من الماء كل شيء حي فكَالو خل نحركَـ الماي حتى نقضي على الحياة .. وجانت الكتل السياسية بالارض متونسة وفرحانة بالانتصار على الارهاب وطرده للبحر .. بس القائمة العراقية مال كَبل جانت رجل باليابسة ورجل بالبحر .. حتى نوبات يفوت الماي من جواها وماتدري .. لأنها خاضعة للدعم الاقليمي اللوجستي .. وأول شي فرحت بيه القائمة العراقية هو سحب كاس الخليج من العراق لأن حكومة العراق غير شرعية وتقف بالضد من المصالح القومية !! مالت البحر المايتكَيش … والعراق جان ومازال يشكل رأس الخليج بالخارطة !! المهم .. السالفة بيها ماي خابط !! ومليوصة .. يكولون بحور الشعر جانت ستعش بحر سلام الله على الثنعش .. بس الظاهر العراق لأن عنده انهار اثنثن واحد منهم مضكور بالقرآن وهو الفرات .. ضاجو الخليج وسحبوا البطولة من البصرة لجدة .. والمارضه بجدة .. رضه بجدة وخروف.. هم ماعلينا بالوادم .. يكولون الزورق مضكور عند نزار قباني .. يكول : ماعندي تجربة بالحب ولاعندي زورق !! هذا صدك فايت الماي من جواه !! المهم ، سالفنا يكولون الارهاب اللمفتح كلشش راح اخذ زورق وفجره بنص الماي ومات واحد من البحور وسموه البحر الميت .. ولحد الان الوادم تطالب بكتال البحر الميت وعافوا كاس الخليج .. رغم كل اللوجستي ..!! يعني ضرغام ماراح ينزل مادام الخليج صارت لجدة !!
