ايهاب المالكي
اتحرگـ خيم راعي الخيم موجود
ما يقبل بحرك خيام عايلته
لازم يرجع ومو شرط جايب ماي
يرجعلي واعرفه ما يعوف اخته
اذا رد للخيم يصعد وفر بالنار
چن مشهد نزوله السحب عايدته
وگع لا جذبت عباس عود يطيح
جا زود لبروحي منين جايبته
اكو لازم سبب اخر بس مو موت
هاذ اياب روحي عدل شايفته
انه متعاهده ومتحالف انه وياه
متفقين اموت وما مفاركته
يمكن من وصل شاف النهر مابي
ماي وروحه يرجع مامطاوعته
يمكن صوته اجه يوادعني
لاكن لا انه اتيه ابو فاضل كون سامعته
ودعت العمر ماودعت عباس
غير الكون يهتز لو موادعته
بس شلون اذا بيه نفس ما معقول
ريحة حرك خيمه هناك واصلته
دخان الخيم لو واصل العباس
لهنا جان وصلت نار عاطفته
من يكلي عدل وانطيه عيوني اثنين
حتى اهدم بروحي العزه الناصبته
منو شايف كمر تارس عيون الليل
خله يكله زينب تره مناطرته
وانه راح انتظر عالتل وحط اشموع
وافرش ذكرياتي وعمر عايشته
واسولفله الجره قد كان يا ما كان
فارس للشدايد جنت ذاخرته
اذا مر عالورد يمشي الفراش وياه
يبقى الورد كوه الكاع لازمته
عله ما گد رمز حريه تشعر بيه
عالرگبه البلابل وشم راسمته
فارس صورته بكل امنيات الخيل
كل الخيل تحلم كون شايلته
خفف بلوطئ حد اختلاط بريح
بحيث الكاع تحلف ما ملامسته
انه ياجرحي هذا السولفتلك بيه
لو موجود يمي ماتصير انته
على كل حال صارت وهسه انته وياي
وفتر الزمان الما محسبته
جاوبني اكو بالي سؤال يدور
سئلتني دمعتي وما مجاوبته
من يمشي الجسد مو تمشي روحه وياه
شو عباس راح ابدون قابلته
مقوله كدر يحمل افراك الروح
هذا البي ترافه بكبر منزلته
عله ماكد ترف يجرح احساس الماي
دتسئلولي الشريعه خاف جارحته
واذا تلكونه شوفو عنده راي ايعود
لو ارد لسكينه الامل كاطعته
هاكم دمعتي وكولوله زينب هاي
هاي البيرغ الهه لما منزلته.
كلوله بعد ما للعيال اثار.
بس رماد يلكه الخيم تاركته
كلوله تره زينب تحط اعذار
سمعتوني كلته مايعوف اخته
خلص ظل خيمتي وغطاني ظل دخان
اجه وحده فزع ما محشمته
انه لو روحي تفزع هم اكلهه ارجوج
المو عباس يكعد ما مكلفته
ولهذا السبب كلوله بالعباس
زينب حلفت النه تكول عاذرته
