زيح تراب قبرك قوم
بسك ما كفاك النوم يا شعلان
يلقاف الخمر والجوخ وعبيدان
يا وسفه لبست الجفن وتغطيت بالتربان
ويا وسفه اطلعت مديون يا ديان
زيح تراب قبرك قوم
بسك ما كفاك النوم يا شعلان
يالطولك منارة ولو حجيت وذان
تاليها لحد ضمك عجيبة شهالقصر قصران
يالعيونك لضى من تشيط
وبيهن ما نفرز النار والدخان
قرب تنوركم لو شب
لجبود السمه حلقة يمد السان
واذا لمعت صوانيكم
تضحك معدة الجوعان
وتاليها اطلعت مديون يا ديان
بسك ما كفاك النوم يا شعلان
ريح القيض يبس ريج دلتكم
وسافه وزنجر الفنجان
وذاك الضيم رد لهلك مثل ما جان
كسرو عود بيرغنه ومهوال العشيرة انهان
بسك ما كفاك النوم يا شعلان
شلون تموت واحنا البيك زامطنه
يخناك المنايا ومن يكول تموت
انته ابن الصميده النادبة ذو النون
ومن سمعت بطاريه
زاعت كل بطنها الحوت
شلون تموت
يا طالوت
يالصدرك درع داوود
يالعابر بحور الموت
يا طالوت
من طقات مقوارك وقع مذهول جم جالوت
يالبظهر النهار ويا العده تلاقيت
لا بوقه ولا بسكوت
عندك بالسوير شهود
ويشهدلك جسر بربوت
يزتات الزلم لو هندس جويريد
ما ينرادلك زاتوت
دنهض يا ثخين الصوت يبن عناد يالما والمك تابوت
يالمخورس حلوك الزان صيح بصوتك الزلزال
يا شعلان
وفزع كل عشايرنه يعالي الشان
بني هاشم بني حجيم وجنانه وعزة وزبيدات
عبس جبشه الجبور بدير والكرعان
جياش وشبل وعبيد
اعاجيب وخزاعل عامر وحسان
ازيرج والخفاجه عبوده وعكيلات
بني لامي السواعد منتف الزياد
والصفران
الاحلاف وبني طرفة
بني والي بني عبود تميم وغانم
وفرطوس والبيضان
بهادل والشويلات بني مالك وطفيليه
كعب ودليم اسد وزهيري وحمدان
ركابه والجوابر عيسى والمياح
حِسن شمر بني كنعان
بني زريج وبني عارض وبني سعده
ضفير تكور والسودان
غريري ومنشك وخيكان
بسك ما كفاك النوم يا شعلان
نايم يا جعيد الراي
تحزم بالجفن يا حيد وزيح تراب قبرك قوم
بويه مرجي بكوسر الديوان
مقوارك مغندب ومهضوم
حل وقت الملاكه وساعتك حلت جا المن بعد مضموم
هدل الرسن خل يهدل بمهرك لو لثك حيدوم
تدك دك صدرك وعيب عليك تثاوب كبال الكوم
نايم يا صقر يا حيف والغربان بربوع العراق تحوم
ياجيثوم
تفز مرعوبة لندن لسه من حلمك تسولف بيك يا جيثوم
بويه يالمابيك شي مذموم
بسك كوم
صار سنين عدنان بشواجيره الفشك مفطوم
شنهي العطلك لساع ما عندك خبر وعلوم
هاي اهل الرواية السود تكوم تلكه خطارك
مدلها الغلايج قوم
هاي اهل الرواية السود اجتك يا سهيل نجوم
والباعوا قضيتنه
يظل عار البعث بقصصهم ليوم الحشر مفطوم
يا رمز الثورة والثوار يا شعلان
بطن الجابتك حرة وشريفة وجابت الشجعان
