يا طبيبي اصواب دلالي كلف..
لا تلچمه ابحطه السماعة…
آنه گلبي اويه الوطن ما يختلف!!.
بالدقايق والثواني او ساعة..
– – – –
يا طبيبي خيمتك خيمة شفاء..
تبقه جوال الشعبهه بالوفاء..
يا طبيبي الحزب علمنه الولاء..
للشعب والحزب هاي اطباعه
– – – –
يا طبيبي احنه علمنه فهد..
للحزب والناس وفاية عهد..
الخيمة لو طاحت تطيح إمن العمد
واحنه خيمتنه الشعب وذراعه..
– – – –
يا طبيبي للشعب احنه خدم..
الناس گالتهه صدگ نكتب نعم!!.
احنه چاكوچ لحزبنه واحنه منجل للعلم..
والسفينة الحزب واحنه اشراعه..
– – – –
يا حزبنه يا فكر يا هندسة..
يا صُباح العافية وأحله مسه..
يا حزبنه ايعيش فهد الأسسه..
انذوب بسمه كلنه إله فزاعة..
– – – –
يا طبيبي يا شيوعي يا نظيف!!
ليش گلي هالحزب باقي عفيف؟.
او ليش چفه للشعب وردة او رغيف؟.
وليش كل اشطوطه حُب رضّاعة..؟
– – – –
يا طبيبي  گوم داوي أهل الفساد
ذوله اكبر مرض نازل عالعباد
يا طبيبي بهالوطن يكفي الحياد
يا طبيبي امنين هل طرگاعة
– – – –
يا طبيبي ابيوتنه خيمه إلك
انته من عدنه طبيبي، احنه هلك
يا طبيبي كل حچي الدولة كلك
والشعب سووه فقط شماعة!!.
– – – –
يا طبيبي المرض بس عدنه يزيد..
والعلاج الموضعي لا ما يفيد
يا طبيبي اوداعتك كله يزيد..
امنين ما تلتفت تلگه اتباعه..
– – – –
يا طبيبي الطفل عاف المدرسة..
وخبزته بالهم طبيبي إمغمسه..
ايشوف ابن مسؤول جوگه تحرسه..
القاط فله القندره لماعة..
– – – –
يا طبيبي اصوابنه كلش صعب..
احتيال وبوگ والباقي نهب!!.
يا شعب گلي اشوكت ليمته تهب؟.
والشعب چا وين گلي اسباعه؟.
– – – –
يا طبيبي اوداعتك كلشي إنكشف!!.
والحرامي الباگ حته اسمه انعرف..
ترس بيته اشكال أنواع التحف..
والشعب حصته الفگر بانواعه!!.
– – – –
يا طبيبي يا شيوعي يا أصيل..
من تزور ابيوتنه اتشافي العليل..
انته بخلاق الحزب طبعك دليل!!.
ومن تودعنه اشحلاته اوداعه.
– – – –

يا طبيبي المرض عدنه ما يطيب..
لو تخلي اگبال كل واحد طبيب.
المرض من ناس تاخذ ما تجيب!!.
والشعب خلوه مثل خراعة..
– – – –
يا طبيبي الناس عرفوهه غلط..
الدين بالفرهود والسبحة انخلط..
يا طبيبي النفط بالجيب انشفط
او بقوا اهموم الشعب تجواعه!!.
– – – –
يا طبيبي الناس كلهه هاجرت
ومن مواعيد الدوّيله أيست
يا وزارة گلي خدمه قدمت؟.
بس عناوين وخطط خداعة!..
– – – –
يا طبيبي الشعب بس رايد ستر
ايريد يسكن بيت حته لو شبر.
يا طبيبي الوضع عدنه يستقر؟.
لو بعد انگس تصير اوضاعه؟.
– – – –
يا طبيبي الناس كلهه امدوهنه
نص تجدي او نص طبيبي إمسودنه
يا طبيبي .. النخل حزنان انحنه!!.
او يمكن إيعوف الوطن وي گاعه
– – – –
يا طبيبي هالشعب بلشه بلش..
المات گلي ايصير يمشي اويّه النعش
إقبض احسابك يشعبي من دبش
هاذه باگ الجدر والفرگاعة!!.
– – – –
يا طبيبي الوطن يمشي ليوره.
هاي قصة يا طبيبي امدسترة.
احنه بالمگلوب هم نلزم سره؟.
لو نخلص الوطن من اضباعه.
– – – –
يا طبيبي يا شيوعي يا أنيق
انته لابناء الشعب أخ لو صديق!!.
إنته فراشه وّتشم.. ورد ورحيق!!.
ونرجس او جوري وعطر نعناعه!!.
– – – –
يا طبيبي هاذه حالي او قصتي
للقهر جيت احتفل وي خيمتي
يا طبيبي ارجوك تقبل وردتي!!.
اوياهه بوسه ابخدك اولا دلاعة!!.
– – –
يا شعب انتخب للحّبك صحيح!!.
هوه رايدلك وضع حتماً مريح…
اوضع علامة صح لبو حچي الصريح
هوّه أولهم بحقك داعه!!.
– – – –
يا طبيبي اصواب دلالي كلف
لا تلچمه ابحطة السماعة!!.
آنه گلبي اويه الشعب ما يختلف!!.
بالدقائق والثواني او ساعة.