حسين القاصد
الصخرة مضكورة بالكتب بشكل مريب !! يعني مو مثل هسة من نضكرها ونمشي .. لا كَبل اللي يضكرها يوكَف ويطكَله صفنة من الزينة وبعدين يهز ايده ويمشي ، بس ليش يهز ايده محد يدري !! وكبل الوادم مرتاحين لأن حيطان ماكو .. يعني مايلطخون راسهم بالحايط .. بس اذا شافوا صخرة يتناطحون وياها .. الوادم كَبل شبعانة وتتناطح وي الصخر.. يكولون واحد منهم ذابح روحه الا يفلش الصخرة براسه الى أن الصخرة فلشت كَرونه .. يعني چانت عنده كَرون بس لاتفتهموني صح!!
كناطح صخرة يوما ليوهنها
فلم يضرها واوهى قرنه الوعل
وهاي الصخرة اللي فلشت كَرون المسكين !! جانت أرملة لأن رجلها ميت .. جانت الصخور كَبل نثية وفحل .. بس اخر صخر طلعت نار براسه ومات وبقت بس الصخرة مقاومه كل اشكال المياه وصامدة وتتضكر صخر لأن چان حاميها بس مو حراميها!!
وَإِنَّ صَـخراً لَـتَأتَمَّ الـهُداةُ بِـهِ
كَـأَنَّـهُ عَـلَمٌ فـي رَأسِـهِ نـارُ.
چان صخر هيبة وصدر ديوان بس مو ديوان الامانة مال كَبل !! ومن يومها ظلت الصخرة محزنة وتكلست من الحزن وصارت الوادم تضرب بيها المثل بعدم الاحساس .. حتى المتنبي يگول .. شنهي قابل اني صخرة حشا السامع : .
أصخرة أنا،مالي لاتحركني…
هذي المدام ولاهذي الزغاريدُ
وراح وكت واجه وكت والصخرة شافت مسلسل الحسناء والوحش ورادت تگضي العمر وياهم حتى تصير الحسناء والوحش والصخرة .. اتضكر حتى فالح حسون الدراجي يكَول (الكَلب موصخرة ) .. اي طبعا وين اكو گَلب وزنه 150 كغم .. يالعايش انت بارض أخرى !!خل يولن.. ترى العقل موصخرة!!.
