ـ انه مشتاكَـ  ..أكثر من عذابي و طول الغّياب 

انه حملي كسر ظهري..والتـّچيت اعله الباب..

انفتح باب الجرح والحوش..

وباب أسراري من صدري

إعصار وجرف كل عمري

وانفـتحـت بروحـي أبواب .. أبواب…

أول ما دست.. ياحوشنه الضـيكَـ

ينازل للخصر.. كاشيه مكسورة

لمن چِـّـنـه نزحف چِانت اتطكَـطكَـَ

إيه ياحوش يزغيرون

يامن چان كل  الكون .. 

طبـّكَـناه بلف ياعلي.. و كل كاشية من فد لون

لسه بحوشنه يم قاطع الدورة ..على البسمار

أوراق الكهرباء والماي والحـّراس والتليفون

والرازونة..لسّـه امشّـرعة اعله الكون..

..تهب نسمات خجلانة ..

تمر خطوات تعبانة..

تمر أوجوه محتركّة بسموم الصيف..

مثل كابوس لو هذيان ما بين الصحو والطيف..

صدى وأصوات حدادين.. فتاحين فال..

امجاديه .. امخابيل.. خياطين فرفوري

بياعين حصران ومكانيس.. وسِلال اثروب

و ابطون وسمچ تايخ وطير الماي والزوري

وسدارة حجي عبود المضمد تخطف بسرعة

على بيسيكل حجمة ثمانية وعشرين..

و وجه مليان جص .. ابصفحة اللوري..

واسماعيل اجه.. وأركض أفك الباب  

– ربع قالب ثلج ..فصّين..مكسور

و هاي الورقة .. خلّه ابجيبي منشور ..

 و سبع نسوان يتحزمن.. ويكتمن ضحكهن..

.. زلم ..صوب الفاتحة ..يروحون…

لواعيب السكك والقوة والشرطة 

يتشاقون..و يضحكون..و يسّلمون 

رسن .. مجبل عبد..كاظم أبو العصبة

جمعة ..كاظم لعيبي.. حسن حياوي

فالح.. تركي ..حنون 

وبشـّار.. وتتبعه اعيون و عيون..

و.. ذهب ..فضة .. رحي وسنون..

وبنات المدرسة يمُــرّن ..

عطرهن والخصر يلهث على الشيفون

والرازونة..لسّـه امشـرعة اعله الكون..

عبر منها الضوه.. والرشِـكَـ يا ما دكّـ على الكرتون..

.لسّـه بحوشنه امصـّلى عتيكَـ وبارية وصينية الفافون

وطيارة ورق مكَطوعة وجعاب

ودعابل ملحه وابطاله سفن آب..

..أنا الناسي الطفولة وسافر وشاب

ورجعت البيت ..شفت البيت..

..يشبه عش الغراب..

حتى الصور عالحيطان ما حفظت ملامحهه ..

انمحت.. ذابت ..وغابت  ضمن من غاب

لكَيت بحوشنه امرايه على الكاشي

شفت بيهه وجه محتار.. ما مفهوم ..

لا راجع ولا ماشي..

شفت عيون تعبانة وتجاعيد وسمار وشيب وتراب..

..بعد بـيَّ محبة ..ومامش احباب

بعد بـيّ  لعب..و صحابي متغربين..

لو أموات..والباقين شِيّـاب..

چِـنـّه اطفال متعلكَين بالبسمارعلى حيطان غرفتنه..

بصـوَرنه واحنه طلاب..

بالمدرسة..بعمر أربعطعش أو دون

ابكَـهوة بشـارع السـعـدون

واحنه شـباب

صورنه الحمره ..واحنه أوجوه ممنوعة

وصورنه الخاكي …وإحنه جنود

مشرورة ملابسنه على الأسوار..والأسلاك مكَـطوعة

وصـَّل قمصان..فانيلات..مو رايات مرفوعة..

مهزومين..مختنكَين.. مشتاكَـين.. يا أحباب

مشـتاكَـين.. نشـــتـّم الهـوى المـا هـاب

دوّخـنه الفقر والحرب يا ديلاب عيد اضحيه..

يا هـّم ..يا وكت.. يا عمر..يا ديلاب..

..ياحـوش الطفـولة الماعرفناهه

ولا شاهد علينه ايكَول عشناهه

الشمس حركَت سطحنه و..جير..

من مرزيبنه المشروم ينزل جير

ودم متخـثر بريش العصافير

على شِبّـاك غرفتنه و ستايرنه

المخـتنكَة بجكَـــايرنه

بأثر إيدي على الشباك من كنت انتظر..و ارسم مشاوير..

بتاريخ امتحان الهندسة والجبر مـكـتوب بطباشير

ينزل جــير

..على بصمات وردية

بكَـشر زهدي وجنحان الصراصير

لا لوحة  ولا منظر طـبيعي ولا تصـاوير

بحيطـان الغـرف.. جـير وبسامير…