حسين القاصد

الدروب هواي واكثرهن مضكورات بالكتب .. واكثر هاي الدروب هو درب التبانة وهو مجرة لولبية الشكل. تحوي ما بين 200 إلى 400 مليار نجم ومن ضمنها الشمس، ويبلغ عرضها حوالي 100 ألف سنة ضوئية .. بس مئة الف سنة ضوئية هواي يعني شكَد تحتاج كهرباء !! والمجرة اللولبية زينة لأن متلولبة جدا !! هسة شعلينه بالوادم ومجراتهم !! خلونه بدرب الدفانة .. يكولون قبل أيام لازمين واحد متلبس بالجريمة .. وچانت بيده صخرة يريد يدفن بيها المجاري حتى يصير فيضان .. ومن صار الفيضان بوكتها صرح مصدر مسؤول رفض الكشف عن اسمه (خاف يجيسه برد ) بأن الفيضان سببه ان احدهم دافن شي بالمجاري وهذا الشي وزنه 150 كلغم .. وبعد الاستفسار والتحري عثروا على صخرة لولبية عملاقة بس مابيها ولا نجم !! لاتفتهموني صح فدوه . ويگولون هاي الصخرة مامكتوب عليها اي شي .. بس هي مدبره بفعل فاعل مو بفعل مفعول به !! من جهته افاد المصدر بأنه اثناء الجولة المطرية تم القبض على احدهم وهو يفتش في مياه الامطار بشكل يثير الشك !! وتأكدوا من هويته وطلع الزلمة يريد يدفن الطريق لباب بيته .. فالقوا القبض عليه بتهمة انه دافن شي !! بس مايعرفون شنو هذا الشي واثناء التحقيق اعترف بأنه المسؤول عن دفن الصخرة !!. خوش دروب مو ؟؟ لابو حتى الحسناء والوحش.