يالشايل همومك والفرح عالباب
عرفتك بالزغر هسا ابعمر شياب
مـلجوم الجرح لسه الجرح ما طاب
حـبيت الجنوب ابنخلة السياب
لا هادنت ظالم لا بست أعتاب
فراشك مو حرير افراشك العطاب
لا عاكك شتانه ولاشمس نص آب
بهرني بيرغك من شفته كله اخضاب
***
تعلمت الشعر والمدرسة النواب
ومشت دربك رفاقك والدرب تيزاب
وغيرك بايع الأوطان والأحباب
ينوجولك غدر ويكشّرون أنياب
يا عالي البخت هذا الدهر دولاب
يالتندل طريق الشعب باب اباب
حـبيت الكصـب والحـلفه واللبلاب
تحب كل البشر تدريه من اتراب
اكصدت درب الشهادة اتصير الك محراب
جـافيت السيوف وثقفت بكتاب
حـمـامـات السلام اتوكر اعله احراب
مـهـظـومة الشطوط الجاورت اجـناب
يديوان البخيت ويا مضيف أطياب
يمدوخ الدنيه وتاج للأحزاب
يبو الايد النظيفة ولا خنت بحساب
نبراسك (سلام ) وخيرة الأصحاب
يا واسع الراي ابفكرك الثقاب
شل جرحك يغانم لا يصير أعـتاب
بعدنه ابصف شيوعي وللفكِر طلاب
يا يوم الـتبسم ثكلت اهمومك
ما شـفـتك امعيّد سود بهدومك
تزداد الجروح اجروح كل يومك
ومن كاع الشمال اورودك اشمومك
ولا دنكت راسك ربعك وكومك
نايم مطمئن امشردغ بنومك
خاويت الشغيله وفلحك انجومك
من دم الرفاق ونزفة ادمومك
قريت ( أم وبراءة ) وبانت ارسومك
تهتف عالمشانق مجدت اعلومك
يسبح بالرذيلة ولا رخص سومك
لا عفت الفريضة ولا بطل صومك
لاويت الزمان ابحيلك اوزومك
تجوّح كل جرح عطابة اكلومك
***
مسكين ويتيم ايصير مخدومك
متحابي أخو ولاخال لااعــمـومـك
وحـبيت العراق ومحد ايلومك
وحدت للسيوف ابشعبك اخصومك
ميهمها الذبح تستنطر اقدومك
فرات ودجلة ناشف ينتظر ديمك
يربعة كل عشيرة أكليطهم دومك
***
كلها غيوم صيف وتمطر غيومك
ربيت الرفاق ابهذا مفهومك
( فهد صارم ) وفه وماخاب تعلومك
يا صدر المضيف الغير لملومك
شد ايدك الشعبك كومك اترومك
شيطان البزرنه ونجلي كل ظيمك
