فاضل عبد السادة
هو مو كلمن ينجرح جرحه يطيب
لا ولا كل بيت ضعفه من الاساس
لا ولا كلمن هجر كاعه غريب
كلشي بالدنيا اله احدود وقياس
اكو ناس كلوبهه من الهم تشيب
واكو ما مهموم ومشيب الراس
الناس بيهه اجروح تحتاج لطبيب
وانه بيه اجروح تحتاجلها ناس
كبل حسرة يخلف بكلبي اليغيب
بإنتظاره ابقى شمع واشواكي ياس
لكن من شفت الغدر من القريب
بدلت دمعي ضحك والسلوى كاس
اني عاشك ضيم واطرب للنحيب
هم شفت شجرة بحياتك تهوى فاس
وانه مكور حزن بس مليان طيب
حتى بلما حاس بيه بضيمه حاس
كالمسيح اصبحت وهمومي صليب
والهموم شلون من عدها الخلاص
عاشرت بلبل ربه ولكيته ذيب
وهسة اشك حتى بعوادين الاقفاص
مو عجيبة انخنت بس هو العجيب
تبقى للخاين وفي وكلك اخلاص
ليش يا كلبي لظلمهم نستجيب
ويا بريء ال يقبل بحكم القصاص
لا اتصورلي العدو بصورة حبيب
ولا اتكلي الورد اقسى من الرصاص
ولا اتكلي النار ما بيهه لهيب
آني شاعر لا اتصير براسي قاص
