صباح الهلالي
بعدنه بحيل الأول مانطخ راس
وجرحنه ايطيب كلما جاسته النار
نخل صرنه يبس من شابكه العوز
كرب خد النخل بس كلبه جمار
انتفظ بكماط صبره العمره يومين
يذب ثدي امه غاد اويرضع الثار
لو أيوب يحضر ساعة ويشوف
وعلي جان استحه من صبر الزغار
تكب بضلوعنه وتوصل للعيون
حدهه ويه الرمش وتموت الاسرار
ولك نضحك جذب لو زارنه الضيف
جرحنه بطولنه وما شافه خطار
عراقيين ندبج من يجي الموت
نطك صورة ويه عزرائيل تذكار
تظل تغفه غترنه ابفي الشماغ
والحبوبي كحلة ابحي عشار
يظل هور العمارة يغازل اربيل
وتظل شفة دهوك اتبوس ذي قار
داحي الباب جدنه وبيمن اتعيل
ياشفرة مذلة اتلاوي فقار
او تنين الشط ابعمر الشط جذب هاي المواليد
انا ابعشريني من شط العرب صار
امد الليل فوكك واذبح النوم
لجن بدوي اطول خلكي ع الثار
خلك تابوت عدي امكابل الموت
واثبت لليدك بضلوعي بسمار
