شاكر حسن
بيت الحزن كلبي وأنته بابه
وباب الفرح سده ونتي بابه
خالي أنته وعمامي وأنته بابه
أخوتي وأمي أنته وكلشي اليه
………ــ……………
أگل لنفسي بطلي وعاد يوزي
لأبو اسنون المهدمه وراد يوزي
الغدر بالبشر صار أقماش يو زي
يفصله البشر من يغدر بأخيه
…….ــ………..
وحق بخت اليشورن واليهجمن
ابيوت ومنهو يبقه واليهج من
شجاك وحشمتهن وليه هجمن
الشماته وفركتك هجمن عليه
……ــ……….
لهيب اجفاك وج كلبي وجه ولاح
نزل الكاع وبلحظة وجو لاح
لحكني الشيب لعيوني وأجه ولاح
برموشي وترسها بلون ضيه
ــ……………….
زادك ماصخ وفاهي ومر ماك
وعرفنه غايتك شنهي ومرماك
حارس فاشل بطوبه ومرماك
رايح راد كول بيك ميه
ــ…………………….
حزن يردم حزن والآه طخ آه
وكت خله الأخو بنيران طخاه
تعال وشوف دمعي وهاك طخاه
ايتشظه أجروح من ظيم العليه
ــ…………………
دموعي أنهار من يجرن يرن نور
يحال بظلمته وماضن يرى النور
عيوني أجراس من تنظر يرن نور
يهزني بنوره لو مريت بيه
