رفيق الخيال
شلتك من دماغي وما افكر بيك
وحته اسمك نسيته وبعد ما اذكره
حسبتك وفي وامنت كلش بيك
اثاري من الوفه ما تمتلك ذره
مسرع ما نسيت حجايتي وياك
وذيج ايامنه السولفنه والعشره
جنت ترتاح لو كتلك اموت اعليك
وخدودك تصير من الخجل حمره
ولو اكتب شعر بيك تغزلت بيه
صافن تظل يمي وبالشعر تقره
ولو كتلك احبك تضحك وفرحان
تطير من الفرح جن طير عالشجره
دريت تغيرت من رحت جم اسبوع
اجيت وما كلت اسباب هالطفره
عليه شبدلك وشغيرك شبساع
شصار؟ خليت الحلاوه البينه مُره
يمكن قرو باذنك لو حجولك ناس
حته اسمي بعد ما صرت تعتبره
بس صدك نسيتك بعد ما اهواك
ولايهمني عليك الصار والاجره
ولا اسأل عليك شلونك؟ احوالك
ولا مني رساله تشوف بالمره
أيس بعد لتصدك ادكلك باب
ولا ازرع ابابك وردتي الصفره
ما تغريني منك جلمه لو مريت
ولا كلبي يرفلك لا ولا شعره
لتفكر تجي باسلوبك المعسول
ما ردلك ابد انساها هالفكره
