مظفر النواب
بگت ورگة ياسك ابستاني
والباقي بحياتك..
بقت الطوفه.. وحياتك..
أخذف مخاذف صگر
مگطوع بالوحشة
وگرب ليل العمر
وانتَ..
ويَه ذاتك..
سولفن عنك
أميرات الفخاتي
گالن: النگار بالزعرور
ما يوصل حلاتك!!
چنت أتانيك بمحطات العشگ
ليه منزلت؟؟
عَدّن فراگينه الصبر..
والروح
منذوره كلبدون..
لعباتك
يا بعد روحي.. شحلاتك!!
يا بعد روحي.. شكثر زلفك بريسم؟؟
أهيس لمن أشوفك
گلبي..
وردة ماي تشهگ
بچفي.. تشهگ..
أهيْس
لا.. لا على بختك..
رايح أغرگ
گلي.. چم غرنوگ مات بحسد
يتلع.. يا الخطايا ابرگبتك
مالي حيل آنه أجيسك
لا يظل طبع إيدي
فوك الخصر.. حاير!!
احلف بفنجان صرتك
ظلت من أيامي.. شَفّه
وبيها.. كل الهيل..
عاد.. إنت..
ووگفتي..
ومستحاتك
سنين.. باريتك.. على محاچي الثلج
يا وسفة.. الوسفات
شحيت.. برباتك!!
شوف حالي..
شلون
بلوطة شهيگ.. بمگبرة..
وتعوي عليّ.. دروب عمري
وانطر الصد.. برضاتك
يوم حادي افراگ عشگك
حدى.. والتمن عليَ..
تخورست.. چني لگوته!!
واعتلگن شموع الشماته
على.. الصواني
ولوَن.. تدري..
شلون يتگلب.. بگلبي العتب..
وأنت الليل..
وسولفني.. زماني
للي مايسوى.. يبَو الكلفات..
وسولفني زماني
سلميت عليَ.. من طارف چلمتك..
لا ولك هاي بنادم عليَ
وحشم الها.. بالسواني!!
حبه.. من شفتك..
حشمها.. تردلي روحي..
وروحي طيره.. مثلجه..
وعلگتلك..
بين روحي..
وبين.. ترچيتك..
جناجل..
عتب.. ومعاتب..
وهلهولة.. رجه..
الاّ.. ما ظنك.. بعد
الحبي.. ترجع..
