شاكر حسن
أمي بالشدة رغيف بحلگ جايع
التواضع اتعلم من امي يتواضع
امي من تغسل اديها
الماي يتطهر بديها
أمي ثوب الله بس
لايگ عليها
ولون تبجي
تطفي نار اللي بجهنم من بچيها
وياحچيها
من تسولف مانضوك الزاد
نشبع من حچيها
أمي يا أمي شسولف؟
من اروح اترش وراي الماي واتگلي
ييمه امودع الله وبالسلامة
اتضم دمعها وتخفي حسرة
نشوف بس الأبتسامة
اتگلي يمه المايحب ابلاده ضايع
يعيش ماعنده كرامة
أمي لمن مات اخويه
ناحت ومن لطمت الچرغد نزل
شافو الشيب أستحت
الشيب ظل ينگط خجل!!
أمي عفة
امي براءة بجف طفل
أمي بتراب اليأس تزرع أمل
الأمثال اتعلمت من أمي
تضربلك مثل
جبل امي
أحنه السهول وياسهل يوصل جبل
أمي دمعة وبالفرح موجود أثرها
أمي ثمرة
ومن نخيل اعراقنا الزاهي تمرها
أمي ماواحد گدر يحمل صبرها
زينب المظلومة امي
من انسبت بالشام والظالم اسرها
أمي زهراء البتول اللي
اندفن وياها سرها
أمي بس الباري ربي
ايميز ويعرف قدرها
وحق من انذبح ظامي على ماي
حزين وحاير وصافن علامي
سماء وارض تنشدني على أمي
لأن أمي كرامة وطيب هيه
