احمد الحسيني
تنفس دمي نبضك وخنگت الجروح
ومطرت فوك عمري شفايف أتغنــّت
عيوني أستأصلت كل وردة فوگ الگاع
وزرعتها ابنظرتي الوجهك أتعنـّت
النسمة تصير سم وتبقى بيه تطوف
أذا أنفض هدومي ومسمعت حنــّت
عندك قصص ويه هدومي منحوتات
بخيوط الملابس دنيتي تحنــّت
وزفيت الدمع لأقرب غصن زيتون
من شفتك اجيت وروحي الك ونــّت
بمشيتك رتبت كل فوضى تبني الروح
قوانين بخطوتك للهوا انسنــّت
من أشتاگـلك ياكلني عطر الياس
وأحس كل النباتات بغزو شنـّـت
حروب تريد تشرب من جمالك ماي
وتباهي الطبيعة بلونك أندهنت
حچـيت بوجهك الأي شي يصد بالعين
وعصافير بقفص عندي الصبح صفنت
افتح ريگــ أذنهن بسمك بكل يوم
ونده من الصفنة اعصر صورتك غنـّت
وبدت انغامهن تحتل زوايا البيت
وزايا البيت بس بنغمتك ظنـّـت
رادت روحي وجهك حتى تنسى الجوع
وأيام الحصار شلون من مرّت
رادت عيني عينك حتى تنسى الموت
وليالي الطائفية البس ضحك جرّت
ردتك للثقوب البيه بيها تعيش
وتمليها ضحك وسوالف اسمرّت
ردتك بس تنسيني العراق أيام
وتغنيلي اغاني بكلبك احترّت
