المرحوم عطا السعيدي
كل مشوار لازم يبتدي إبخطوة
إبدي من السَفح تتناوش الذروة
شدوا حزامكم والله المعين إبهاي
صفوها النوايا او إنتم الصفوة
الكل تفزع سوا والحَيل شد الحَيل
والغاية العراق وغيره مانهوى
جيش وشعب كلنه وشرطة فَردْ إحزام
رجوانه الوطن ياعِزّة الرجوى
الوطن لو ماهله يتفرهد وينباكَـ
ترضون إيتفرهد بيتكم عِنوه
وترضون الإرهاب إيصول وانتو سيوف
ومجرّب فعلكم كّـبلْ مو توه
يالبيكم كرامة بابل او اشور
او يالبيكم إمروة إتغطي المروة
العراقي وغيرته مَضْرَب مَثَلْ للناس
وأول بشر يتلقى إبصكَر شلوه
وذا عدّوا أحرار الكون بالتاريخ
أول إسم بيهم ينذكر هوه
هاك إتصفح التاريخ وإقرا وشوف
من هذا التراب الغيرة تتسوّا
يرضعون الكرامة إبدرّة الحرّات
ويدرسون الشجاعة بكّومة اللّوه
ماكّصرن جابن والنساء إحيال
أوحبلن بالمراجل كّبل من حوا
النساء الخلفنكم بالأصل لَبوات
مو إلهن النون النون للنسوة
إبدليل إتشوفنه من ننتخي إعله الموت
حته البلكّماط إيكوم للنخوة
حانت ياعراقيين ياهل الزود
دعوة من الوطن لبيتوا الدعوة
ولو بعض النفوس إتريدكم شطرين
وتريد الوضع يفضل كما هوه
لان عقدة الماضي تعيش بيهم دوم
ومحجرة العقول و بالية ورخوه
البعض منهم يسولف خارج الموضوع
لان مُجْمَلْ حياته إبتدت باللّغوه
اوطبع البوم يعمه من الضوه الوهّاج
او من صوت الصفير إتْلَعْلِعْ الطَـطْـوه
بعضهم مايريد الأمن يابغداد
ويحاول يجـرج للفتن كّـوه
العزم بالله الصعاب إتهون والكلفات
وريح السفن هبت مثل مانهوى
