سمير صبيح
شيعوضني الدمع واني الخسرته هواي
وعلى رمله امل كل عمري وشلته
انا الباگو نهاري ورحت ادوره بليل
وبالمسودن طبع ميعوف سالفته
على نفس الدرب ذبولي بس الصوف
حتى ارجع وگول اذياب ماكلتـــــه
وانه الماصبر والعطش ما وازه
دنت نفسه وذبح بالصحره راحلته
گلب ماچنه گلبي چني متبني
جرعته التعب مايوم دللتـــــــــه
طفل من ايده اگوده وهوه يمشي وياي
وعلى ضحكة بكهف للموت نزلته
انغلق باب الصبر گد ما ادگ عليه
مو خالي كرم بس اني مللته
بعد ماهد سهم كون الطريدة بعيد
مابيها فخر لو گول وصلته
وشفت عصفور ميت كل جرح مابي
حرت هاي المنيه شلون واصلته
شلت راسي وشفت بالشجرة عش محروك
گلت هذا السبب والحرگه كاتلته
ونفس موته متت والجسد لعد الروح
وحسرتي بجفن وبدمعه غسلته
سل سيفه الزمن هل من منازل صاح
اعزل ماخفت والزمن قاتلته
صح مالحته ابد لكن ملاني جروح
بس عندي المهم ماعفته قاتلته
بسك ياضمير الصار بيه هواي
بسك هالعمر مايوم چملته
