رفعت الصافي
شلت عشرتك دمعة بعين هالايام وين الله من اشــــــــوفك بلكت ابجيها
تتـــــنادس جروحي من يحل ملكـــاك تلبــس من تشـــوفك خلك راعيها
ما تفرق ضــحكتي من ضحكة الجناز انا وياك حتى الضحكة ناســـــيها
تتـــحزم عـــيوني بـــدمـــع لــــــو مريت عالفطرة وحككك ما موصيها
فــوك متــوني ياخذ راحته التابـــوت صــــبخة وثكل حملك ما يهم بيها
عتــبة بـيـتك تمـــنيـــت عــدها لســــان حتى تكلك اشـــكد نايـــم عليها
ما حركت رمشــك بيك من مريت وان اشــــبك طعـنتك لـمن الاگيـــها
الچگاير كحلت شفتي على حس طرواك ومرات اشتبه وعيوني اسميها
هاي ســـــــنيني بيـــــدك موش طاسة ماي كلما اديرلك ظهري تبديها
عــفتني ابنــــار يـــاهو الگلك ابراهيم والاكثر بالكواغد گمت تطْـــفيها
انـا تـــمنيت تحظر مگــبرة على البال حتى ادفن ذكـــرتك مــا اخليــها
عشــــرتي وياك عشرة سدة ويا الماي اجي بلهفتي وتدفعني وارد ليها
لا تــذب لـــومك عالــقســمة والايام انت المـاردتني القســمة شــعليها
المـــاعنده ســـكف لا يعــــاند ويــه الغيم يســـتبرد ابمجرد يمر طاريها
شكبر صيت البحر گضى العمر مطروح وتسحگه الطيور بطرف رجليها
احساسك بور كتلك ما يطك بيه شوك مثل صحراء تشل جفوف ساگيها
طعـــناتك بظـــــهري تمرجحن بالعيد واگولن عيد زحمة شـــلون ابچيها
بــــس لـــــيا وكــت ابقى لـــهواك شـــراع نسماتك تعــــيل وما احاچيها
ابــتديت من النــــــهاية ويـــــــاك بــــس ما فـــاد اهل مكة ادرى باهاليها
غـــرفة صــــاحبك تشــــبه حضن ســرداب الله يساعدك وشلون گاضيها
