وفاء عبد الرزاق
عنوانك بيديَّه وتاهَتْ اسماي
وعلى عيون السمه أكتب عناوين
عضَّاني الإسم والعين والراء
ولِـﮝيتْ الألف والقاف سـﭼّين
إنت أوَّل من نطى الناس هامات
او وزَّعتْ الرزق بيْسار ويْمِين
وَيْ وهْجْ العطايا الـﮕاك فانوس
وهسَّة الماي يجدَّي ونهري مسكين
يا سيرة عِشب يا خضرة الباب
تعنَّيت وعلى العِتبات قفلين
ردت أكسر اقفالك ردني العتاب
وتدري بـﭼاك انا ودمعات والعين
اذا هلَّت اليمنة البصرة تحتار
واذا غيمت اليسرى تصير شطين
ومن بغداد ونَّت ﮔمت ملهوف
مثل نبتة ويطرها الـﮕيظ نصَّين
إنت أوَّل أمان ونصبة الراس
شلون تصير للقاتل قرابين
يل جسمك نبي وإيديك قرآن
اذا باﮔوا جسمنا اتهدَّم الدِين
صرخة ريح إنت تلفّ الاكون
وصدر أمي صهل ويَّاك مرتين
مرَّة من الحمام العل نخل ناح
ومرَّة من الحليب الصار ريتين
شـﮕيت الهوا وغصبن على الريح
اذا جرحك ﮔمر بجروحي نجمين
واحد من ضواك العاشر الغيم
والاخر من رضاك بجوعة الطين
ترضى يجوع طيني وانت صلصال
وحلم البيت لصدور الحياطين؟
اذا حايط تشرَّخ طاحت اسـﮝوف
واشوف ﭼفوف حيطانك ملاعين
ولك ليش الصفَع خدَّك تِعز بيه
تتقبَّل مهانة وتنطي خدَّين
رصاصت بقميصك لو ثقب مفتاح
اريد ادخل قميصك باب شمسين
لا تـﮝلي غريبة ومالـﭻ امـﭼان
انا مـﭼاني الشطوط وذنِّي ضفتين
مصابيح الضفاير ﭼان عميان
كل شعرة بالف مصباح والفين
لا تغبر عيونيك غبرة الصار
أريد أعرف رضاك شلون بالشَين
بـﮕطرات الندى تلـﮕى اسمي والناي
والسدرة ولعبنا الـﭼان ظلَّين
تهديني النبـﮛ واهديك الالعاب
يا توأم قيامة وطعم مُرَّين
ياطفلي الصغير مدلل ﮔماط
اجيبلك قيامة شلون ومنين
بيك أنت القيامة وسطوة النار
وهنيال الـﮕصب من يحرك البّيَن.
